कांग्रेसले आर्थिक क्रान्तिको अभियान अगाडि बढाउने नेता सिंहको दाबी

काठमाडौँ । नेपाली कांग्रेसका नेता प्रकाशमान सिंहले कांग्रेसले मुलुकमा आर्थिक क्रान्तिको अभियान अगाडि बढाउने दाबी गरेका छन्।

नेपाली कांग्रेस काठमाडौँ क्षेत्र नं ७ प्रदेश (ख)द्वारा आज आयोजित एक कार्यालय उद्घाटन कार्यक्रममा उनले संविधानको नेतृत्व गरेको पार्टी कांग्रेसले आर्थिक क्रान्तिकोसमेत नेतृत्व गर्ने दाबी गरेका हुन्। “आम जनतालाई रैतीबाट सार्वभौमसम्पन्न जनता बनाउनका लागि कांग्रेसको भूमिका महत्त्वपूर्ण छ, जीवन र जीविकोपार्जनको पूर्ति कांग्रेसले मात्र गर्न सक्छ”, उनले भने।

बहुदल आएपछि काठमाडौँ क्षेत्र नं ७ को विकासले फड्को मारेको पार्टीका पूर्वमहामन्त्री सिंहको भनाइ छ। उनले यही वैशाख ३० गते हुने स्थानीय तहको निर्वाचनले प्रदेश र प्रतिनिधिसभाको निर्वाचनमा समेत प्रभाव पार्ने भएकाले जिम्मेवार पार्टीका प्रतिनिधीलाई टिकट दिएर विजय गराउन सबै कार्यकतालाई आग्रह गरेका छन्।

नेता सिंहले संसदमा झण्डै दुई तिहाई जनमत पाएको नेपाल कम्युनिष्ट पार्टीको सरकारले जिम्मेवार भएर देशको विकासका लागि काम गर्न नसकेर दुई पटकसम्म संसद् विघटन गरेको स्मरण गराउँदै अबको निर्वाचनमा जिम्मेवार प्रतिनिधिलाई चुन्नुपर्ने बेला आएको बताएका हुन्।