कैलालीको मुक्तकमैया शिविरमा आगलागी

धनगढी । कैलालीको एक मुक्तकमैया शिविरमा आगलागी भएको छ । जिल्लाको कैलारी गाउँपालिका–७ मा रहेको बिपतपुर मुक्त कमैया शिविरमा आगलागी भएको हो ।

आगलागीबाट शिविरका ७३ घरधुरी जलेर सखाप भएको वडाअध्यक्ष कमलप्रसाद चौधरीले बताएका छन् । उनका अनुसार हालसम्म मानवीय क्षति भने भएको छैन । तर आगो अझै नियन्त्रणमा आएको छैन ।

आगलागी नियन्त्रणका लागि सशस्त्र प्रहरी बल नेपाल नम्बर ३४ गण हेडक्वाटर कैलालीको टोली, नेपाल प्रहरी, स्थानीय र दुई ओटा दमकलले आगो नियन्त्रणको प्रयास भइरहेको जिल्ला प्रहरी कार्यालयका प्रहरी नायव उपरिक्षक बेदप्रकाश जोशीले जानकारी दिए ।

स्थानीयका अनुसार गहुँको नलमा लगाइएको आगो बस्तीमा पुगेको हो ।