कैलालीमा विवाहित जोडी जंगलमा मृत फेला

धनगढी । कैलाली दुई जना मृत फेला परेका छन् । जिल्लाको घोडाघोडी नगरपालिका वडा नम्बर १० पहलमानपुरस्थित तुल्सिपुर सामुदायिक वनमा विवाहित जोडी मृत अवस्थामा भेटिएका हुन् ।

बझाङको जयपृथ्वी घर भएका २८ वर्षीय अमर जोशी र २४ वर्षीया अस्मिता सिंह रुखमा झुण्डिएको अवस्थामा मृत फेला परेका जिल्ला प्रहरी कार्यालय कैलालीका प्रहरी नायब उपरीक्षक वेदप्रकाश जोशीले जानकारी दिए ।

उनका अनुसार अमरले अस्मितासँग दोस्रो विवाह गरेर गत चैतमै बझाङबाट कैलाली आएका थिए । केहीदिन आफन्तसँग बसेका उनीहरू चैत २६ गते घुम्न जानेर भनेर घरबाट निस्केका थिए ।

घरबाट निस्केपछि उनीहरू सम्पर्कविहीन भएका थिए । खोजीकै क्रममा आइतबार उनीहरू जंगलमा मृत फेला परेको डीएसपी जोशीले बताए । घटनाबारे थप अनुसन्धान भइरहेको प्रहरीले जनाएको छ ।