इमान हराएकाहरूलाई भोट नदिनुस् -अध्यक्ष लिङ्देन
मकालु खबर
काठमाडौँ । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले पार्टीनिकटताका आधारमा भोट नहाल्न मतदातासमक्ष आग्रह गरेका छन्।
अध्यक्ष लिङ्देनले इमान हराएका, नैतिकता हराएका मान्छेलाई ‘मेरो पार्टीको हो’ भनेर भोट नहाल्न मतदातालाई आग्रह गरेका हुन्। राप्रपा भक्तपुरले आज सोमबार चाँगुनारायणमा आयोजना गरेको चुनावी सभामा उनले देशको विकास गर्नसक्ने, आफ्नो गाउँको विकास गर्नसक्ने नेता र दललाई रोजेर भोट हाल्न मतदातालाई आग्रह गरेका छन्।
उनले भने, “अस्ति देखापढी गरेर हामीलाई एकचोटि भोट दिनुस्, अर्कोचोटि तपाईंलाई दिन्छौँ भनेर भोट लिएर सांसद, मन्त्री हुने र जनतालाई धोका दिएर केही नगर्ने इमान नभएका व्यक्ति हुन्, त्यस्तालाई भोट नदिनुस्, जनताको साथमा हुने नेतालाई मात्रै भोट दिनुहोस्।” उनले चाँगुनारायणको विकासमा स्थानीय सरकारको ध्यान नपुगेको टिप्पणी गर्दै काठमाडौँ उपत्यकाभित्रै भएर र राजधानीसँगै जोडिएर पनि भक्तपुर जिल्लाको विकासको हालत देख्दा विरक्त लागेर आएकोसमेत बताएका छन्।
जनताले यहाँ बाटो चाहियो, यस्तो चाहियो, उस्तो चाहियो भनेर गुनासो गर्ने ठाउँ राप्रपाले नदिने भन्दै उनले राप्रपाले कसरी विकास गर्छ भनेर नमूना हेर्न नेपालगञ्ज उपमहानगरपालिका नै काफी भएको जिकिरसमेत गरे। राप्रपा एक मात्रै वैकल्पिक शक्ति भएकाले अब एकपटक राप्रपालाई हेर्न आग्रह गर्दै राप्रपा अध्यक्ष लिङ्देनले भने, “भोट त एकपटक राप्रपालाई नै दिन मन थियो, तर आफू अर्कै पार्टीको परियो भनेर धक नमान्नुस्, आफ्नै पार्टीको झण्डा समाउनुस् तर भोट एकपटक हामीलाई दिनुस्।”
कार्यक्रममा राप्रपाबाट चाँगुनारायण नगरपालिकाका प्रमुखका उम्मेदवार रवीन्द्रप्रताप शाहले आफू विजयी भएमा शिक्षा, स्वास्थ्य सेवा निःशुल्क, युवायुवतीका लागि रोजगार, किसानलाई पेन्सनको व्यवस्था गर्ने, बाटो, खानेपानी र जनताको आधारभूत आवश्यकता पूरा गर्ने र भेदभावरहित समाजको निर्माण गर्ने बताए।
राप्रपाले भक्तपुरमा चारवटै नगरपालिकामा आफ्नो उम्मेदवारी दिएको छ।
मकालु खबर
