बागलुङमा मतगणनास्थलको तयारी पूरा, सिसी क्यामरासहित तारजालीको व्यवस्था
मकालु खबर
काठमाडौँ । सुरक्षित तरिकाले मतगणना गर्नका लागि बागलुङका मतगणनास्थलमा तयारी गरिएको छ।
बागलुङका १० वटै पालिकामा स्थापना भएका निर्वाचन अधिकृतको कार्यालयले मतगणनास्थल निर्माण गरी तयारी अवस्थामा राखिएको जनाएका छन्। बागलुङका १० वटै मतगणनास्थलमा सिसी क्यामरासहित तारजालीको व्यवस्था गरिएको छ। ३० गते हुने स्थानीय तहको निर्वाचनको मतदानपछि पालिकाले मतगणनाका लागि स्थलको तयारी पूरा गरेको मुख्य निर्वाचन अधिकृतको कार्यालय बागलुङका मुख्य निर्वाचन अधिकृत वासुदेव न्यौपानेले जानकारी दिएका छन्।
न्यौपानेका अनुसार जिल्लाका १० वटै मतगणनास्थल मत गणनाका लागि सुरक्षित बनाइएको छ। बागलुङको ४ नगरपालिका र ६ गाउँपालिकाको मतगणनाका लागि सिसी क्यामरासहित तारजालीको व्यवस्थापन गरेर मतगणना गर्ने तयारी अनुसार मतगणनास्थल तयार पारिएको छ। मुख्य निर्वाचन अधिकृत न्यौपानेका अनुसार बागलुङ नगरपालिकाको मतगणना जिल्ला समन्वय समितिको सभाहलमा गर्नका लागि मतगणनास्थल तयार गरिएको छ। सभाहलमा तारजाली लगाइएको छ भने सिसी क्यामरा जडान गरेर तयारी अवस्थामा राखिएको छ।
जैमिनी नगरपालिका
यस्तै, जैमिनी नगरपालिकाले नगरपालिकाको वडा नं १ को सभाहलमा मतगणनास्थलको तयारी गरेको निर्वाचन अधिकृत सूर्यप्रसाद भण्डारीले जानकारी दिएका छन्। उनले मतगणनास्थलमा सिसी क्यामरा जडान र तारबारको व्यवस्था मिलाएको बताएका छन्।
गलकोट नगरपालिका
साथै, गलकोट नगरपालिकामा मतगणनाका लागि पुरानो गलकोट माध्यमिक विद्यालयको भवनमा मतगणनास्थल तयार पारिएको छ भने ढोरपाटन नगरपालिकाले बुर्तिबाङस्थित उत्तरगङ्गा माध्यामिक विद्यालयको भवनमा मतगणनाको तयारी गरेको छ। दुवै मतगणनास्थलमा सिसी क्यामरासहित बलियो गरी तारबार लगाइएको छ।
तमानखोला गाउँपालिका
यस्तै, तमानखोला गाउँपालिकामा मतगणनाको लागि स्थलको तयारी पूरा गरिएको छ। सुरक्षित तरिकाले मतगणना गर्नका लागि तारजालीसहित सिसी क्यामराको व्यवस्था मतगणनास्थलमा गरिएको तमानखोला गाउँपालिकाका निर्वाचन अधिकृत लालप्रसाद लामिछानेले जानकारी दिए।
निसीखोला गाउँपालिका
निसीखोला गाउँपालिकाको सभाहलमा मतगणनास्थल निर्माण गरिएको निसिखोला गाउँपालिकाका निर्वाचन अधिकृत गोविन्द गिरीले जानकारी दिए। उक्त मतगणनास्थलमा सिसी क्यामेरासहित तारजालीको व्यवस्थापन गरिएको हो। जिल्लाको बडिगाड गाउँपालिकास्थित मुख्य निर्वाचन अधिकृतको कार्यालयले मतगणनास्थलको तयारी पूरा गरेको छ, भने ताराखोला गाउँपालिकाको केन्द्र भातखाने डाँडामा मतगणनास्थल तयार पारिएको हो। सबैमा सिसी क्यामेरा र तारजाली अनिवार्य गरिएको छ भने अन्य सुरक्षा मतगणनास्थलको अवस्था अनुसार हुनेछ।
काठेखोला गाउँपालिका
यस्तै, काठेखोला गाउँपालिकाको निर्वाचन अधिकृतको कार्यालयले भीमसेन माध्यमिक विद्यालयको भवनमा सिसी क्यामेरा र तारबारसहित मतगणनास्थल तयार गरेको काठेखोला गाउँपालिकाका निर्वाचन अधिकृत हर्कबहादुर केसीले जानकारी दिए। “निर्वाचन अधिकृतको कार्यालय सानो भएकाले नजिकै रहेको विद्यालयमा मतगणनाको व्यवस्थापन मिलाएका छौँ” केसीले भने “आयोगको निर्देशन अनुसार सिसी क्यामेरा र सुरक्षाका लागि तारजाली लगाइएको हो, मतगणनास्थलको तयारी पूरा भएको छ, अब हाम्रो ध्यान निर्वाचनमा जान्छ।”
बरेङ गाउँपालिका
यस्तै, जिल्लाको बरेङ गाउँपालिकाले मतगणनास्थलमा हुनसक्ने घटनालाई मध्यनजर गर्दै सिसी क्यामेरासहितको मतगणनास्थलको तयारी गरिएको बरेङ गाउँपालिकाको निर्वाचन अधिकृतको कार्यालयले जनाएको छ। निर्वाचनमा हुनसक्ने अवाञ्छित क्रियाकलापलाई निगरानी गर्न र रोक्न सुरक्षित तरिका अपनाइएको हो।
निर्वाचन आयोगले सिसी क्यामेरा जडान गरेर मतगणना गर्न भनेपछि सबै निर्वाचन कार्यालयले स्थानीय पालिकाको व्यवस्थापनमा सिसी क्यामेरा र तारजाली लगाएको हो ।
मकालु खबर
