पर्वतका सबै मतदानस्थलमा कर्मचारी परिचालित

काठमाडौँ । पर्वतका सबै मतदान केन्द्र र मतदानस्थलमा कर्मचारी तथा सुरक्षाकर्मी खटिएका छन्।

जिल्लाका कतिपय स्थानमा यातायातका साधन र पैदलमा कर्मचारी तथा सुरक्षाकर्मी मतदानस्थलमा पुगिसकेका छन्। जिल्लाका ७४ मतदानस्थलका १४७ मतदान केन्द्रमा कर्मचारी र सुरक्षाकर्मी पुगेर मतदानको तयारी गरिरहेको जिल्ला निर्वाचन अधिकारी लक्षु शर्माले जानकारी दिए। उनका अनुसार मतदानका लागि आवश्यकपर्ने मतपत्र, मतपेटिका, मतदाता नामावलीलगायतका आवश्यक सामग्री लिएर मतदान केन्द्रतर्फ कर्मचारी खटिइसकेका छन्।

जिल्लामा १४७ मतदान अधिकृत, १४७ सहायक मतदान अधिकृत, २९४ सहायक कर्मचारी, १४७ सहयोगी कर्मचारी गरी एक हजार १०० भन्दा बढी कर्मचारी परिचालन गरिएको शर्माले जानकारी दिए। मतदान अधिकृत र सहायक मतदान अधिकृतलाई शनिबार र आइतबार कुश्मामा तालिम दिइएको थियो।

मतदानको मिति नजिकिँदै गर्दा सुरक्षा र अन्य व्यवस्थापकीय तयारीलाई चुस्त पारिएको प्रमुख जिल्ला अधिकारी नारायणप्रसाद सापकोटाले बताए। निर्वाचनको तयारी अन्तिम चरणमा पुगेको उनले बताए। उनका अनुसार मतदान र मतदानअघि तथा मतगणनासम्मको अवस्थाका लागि तयार पारिएको सुरक्षा रणनीति कार्यान्वयन गरिएको छ।

निर्वाचनमा म्यादी प्रहरी, नेपाल प्रहरी, सशस्त्र प्रहरी बल, राष्ट्रिय अनुसन्धान विभाग र नेपाली सेना परिचालन भएका छन्। निर्वाचन लक्षित गरेर ७४१ जना म्यादी प्रहरी नियुक्त भएका छन्। जिल्लाभर झण्डै दुई हजार सुरक्षाकर्मी परिचालन गरिएको छ। सात स्थानीय तहमा ६१ वडा रहेको पर्वतमा एक लाख २२ हजार ५० मतदाता छन्। ३१९ पदका लागि ८६५ जना उम्मेदवार प्रतिस्पर्धामा छन्।