भोट हाल्न स्टेचरमा मतदान केन्द्र लगिएका एक वृद्धको मृत्यु

बैतडी । बैतडीमा भोट हाल्नका लागि स्टेचरमा राखेर मतदान केन्द्र लगिएका एक वृद्धको मृत्यु भएको छ ।

जिल्लाको पाटन नगरपालिका वडा नम्बर ६ पाटनमा भोट हाल्न पुर्याइएका टुडेगैरका ७० वर्षीय कमलसिंह विष्टको मृत्यु भएको जनाइएको छ । उनलाई स्टेचरमा बोकेर कृष्ण मध्यमिक विद्यालय मतदान केन्द्रमा पुर्‍याइएको थियो ।

मतदानस्थलमा पुर्याइएपछि उनी त्यहीँ बेहोस भएका उपचारका क्रममा मृत्यु भएको जिल्ला प्रहरी कार्यालय बैतडीका प्रवक्ता प्रहरी निरीक्षक लोकराज जोशीले बताए ।

यसअघि बिहान जिल्लाको दोगडाकेदार गाउँपालिका ३ स्थित सनातन धर्म मावि श्रीकोट मतदान केन्द्रमा भोट हाल्न गएका कफल्टाका ८४ वर्षीय हरिसिंह भाटको पनि मृत्यु भएको थियो ।