महोत्तरीका सात जनप्रतिनिधि दोस्रोपटक निर्वाचित

काठमाडौँ । गत वैशाख ३० गते सम्पन्न स्थानीय तहको निर्वाचनमा दोस्रोपटक निर्वाचित हुने प्रमुख-अध्यक्ष र उपप्रमुख-उपाध्यक्ष सात जनामात्र छन्।

महोत्तरीको लोहारपट्टी, भङ्गाहा र मटिहानी नगरपालिकाका प्रमुख यसपटक पुनः दोस्रो कार्यकालका लागि निर्वाचित भएका हुन्। त्यसैगरी, औरही, बलवा र लोहारपट्टिका उपप्रमुख र एकडारा गाउँपालिकाका उपाध्यक्ष पनि दोस्रोपटक निर्वाचित भएका हुन्। लोहारपट्टीका यसअघिका प्रमुख, उपप्रमुख दुवै यसपाली दोस्रोपटक निर्वाचित भएका हुन्। प्रमुखमा शैलेन्द्र यादव र उपप्रमुखमा सरिता शर्मालाई यो सफलता प्राप्त भएको छ। उनीहरू नेपाली कांग्रेसबाट उम्मेदवार उठेका थिए।

त्यसैगरी, भङ्गाहा र मटिहानीका प्रमुखमा क्रमशः सञ्जीवकुमार साह र हरिप्रसाद मण्डल दोस्रोपटक निर्वाचित भएका छन्। विसं २०७४ को स्थानीय तह निर्वाचनमा तत्कालीन तराई मधेस लोकतान्त्रिक पार्टी (तमलोपा)बाट निर्वाचित दुवैजना यसपटक लोकतान्त्रिक समाजवादी पार्टी नेपाल (लोसपा)बाट निर्वाचित भएका हुन्।

यस्तै, औरही र बलवा नगरपालिकाका उपप्रमुख क्रमशः रेणु झा र रेखाकुमारी यसपालिसमेत दोस्रो पटक निर्वाचित भएका छन्। विसं २०७४ मा तत्कालीन तमलोपाबाट निर्वाचित झा र रेखाकुमारी यसपालि लोसपाबाट निर्वाचित भएका हुन्। यता २०७४ मा तत्कालीन तमलोपाबाट एकडारा गाउँपालिकामा उपाध्यक्ष निर्वाचित भएकी महजवी खातुन भने यसपटक जनता समाजवादी पार्टी (जसपा) नेपालबाट निर्वाचित भएका छन्।

यसअघिका १० प्रमुख-अध्यक्षहरू भने यसपटकको प्रतिस्पर्धामा पराजित भएका छन्। त्यस्तै, उपप्रमुख-उपाध्यक्षमा एक कार्यकाल बिताएर यसपटक पनि प्रतिस्पर्धाको अवसर पाएका सातजना पनि चुनाव जित्न असफल भए। जिल्लाका १० नगरपालिका र पाँच गाउँपालिकासहित १५ स्थानीय तहका प्रमुख-अध्यक्ष र उपप्रमुख-उपाध्यक्षसमेत निर्वाचित हुने ३० सङ्ख्यामा २३ जना नयाँ अनुहार आएका छन्।

निर्वाचितमा दलगत प्रतिनिधित्व हेरिँदा प्रमुख-अध्यक्ष पदमा पाँच-पाँच जसपा र लोसपाले पाएका छन्। त्यसैगरी, कांग्रेसले दुई, एमाले र तमलोपाले एक-एक र अर्को एक स्वतन्त्र उम्मेदवार जितेका छन्। त्यसैगरी, उपप्रमुख-उपाध्यक्षमा जसपा छ, लोसपा चार, कांग्रेस तीन, एमाले एक र स्वतन्त्र एक निर्वाचित भएका जिल्लास्थित मुख्य निर्वाचन अधिकृतको कार्यालयले जनाएको छ।

जिल्लाका १३८ वडाका अध्यक्षमा सबैभन्दा बढी कांग्रेसले ३६ मा जित हात पारेको छ। जसपा र लोसपाले क्रमशः ३१ र ३० पाएका छन्। एमालेले १८, माओवादी केन्द्रले १३, तमलोपा र जनमत पार्टी दुई-दुई एवं नेकपा (एकीकृत समाजवादी)ले एक वडामा जित हात पारेका छन्। स्वतन्त्र निर्वाचित वडाध्यक्षको सङ्ख्या पाँच रहेको छ।