डडेल्धुराका नैनसिंह १८ दिनदेखि सम्पर्कविहीन 

डडेल्धुरा । डडेल्धुराको आलिताल गाउँपालिका वडा नम्बर २ का नैनसिंह मडै सम्पर्कविहीन भएका छन् । १८ दिने पहिले कञ्चनपुरबाट डडेल्धुरा आएका मडै बसपार्कबाट सम्पर्कविहीन भएको आफन्तले बताएका छन् ।

बोल्न सुन्न नसक्ने उनी सम्पर्कविहीन भएपछि परिवारले खोजी गरिदिन हुन भन्दै जिल्ला प्रहरीका कार्यालय डडेल्धुरामा निवेदन समेत दिएका छन् । आफन्तका अनुसार कञ्चनपुरको झलारी बजारबाट जेठ ६ गते बिहान ८ बजे महाकाली यातायात को ७८७३ नम्बरको हाइसमा डोटीको गैरा बजार जान भनी आएका उनलाई डडेल्धुरा बसपार्क पुगाइएको थियो ।

हराएका व्यक्तिको खोजी गरी पाउ भनी पटक-पटक जिल्ला प्रहरी कार्यालयमा निवेदन दिइएको भएपनि प्रहरीले ध्यान नदिएको आलिताल २ का वडाध्यक्ष प्रमोद मल्लले बताए । कालो वर्ण भएका अन्दाजी ५० वर्षीय मडैले हरियो झोला र सेतो जुत्ता लगाएका थिए ।

उनलाई भेट्ने व्यक्तिले प्रहरी कार्यालय तथा सम्पर्क नम्बर ९८४८८२५६४० फोन गरिदिन आफन्तले अनुरोध गरेका छन् । परिवारको सम्पर्कमा ल्याउने व्यक्तिलाई पुरस्कारको समेत व्यवस्था गरिएको आफन्तले बताएका छन् ।