कैलालीकाे मोहन्यालका अध्यक्षलाई जिसस निर्वाचनमा सहभागी नगराउन माग गर्दै सर्वोच्चमा रिट

धनगढी । कैलालीको मोहन्याल गाउँपालिकामा अध्यक्ष निर्वाचित देवीदत्त उपाध्यायलाई जिल्ला समन्वय समितिको निर्वाचनमा सहभागी नगराउन माग गर्दै सर्वोच्च अदालतमा मुद्दा दायर भएको छ ।

अख्तियार दुरुपयोग अनुसन्धान आयोगले उपाध्यायलाई निलम्बन गर्न सम्बन्धित निकायलाई पत्र पठाइसक्दा पनि उनको नाम जिल्ला समन्वय समितिको मतदातामा प्रकाशित भएपछि त्यस विरुद्ध सर्वोच्चमा रिट परेको हो ।

भ्रष्टाचारको मुद्दा विचाराधीन रहेका बेला स्थानीय तहमा जनप्रतिनिधि चुनिएको भन्दै अख्तियारले स्वतः निलम्बनमा रहने व्यवस्था कार्यान्वयन गर्न संघीय मामिला तथा सामान्य प्रशासन मन्त्रालय, निर्वाचन आयोग र सम्बन्धित स्थानीय तहलाई पत्र लेखिसकेको छ।

अधिवक्ता वसन्त जैशीले दायर गरेको रिटमा उपाध्यायको मुद्दाको अन्तिम किनारा नलाग्दा सम्म उनलाई निलम्बन गरिएको भन्दै आगामी ३० गते हुने जिल्ला समन्वय समितिको निर्वाचनका लागि प्रकाशित मतदाता सूचीमा समावेश नगर्नु भनी अन्तरिम आदेश माग गरिएको छ।

गाउँपालिकाको २ नम्बर वडाध्यक्ष रहेका बेला उनले भ्रष्टाचार गरेको ठहर गर्दै वैशाख २ गते अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको थियो । अदालतमा मुद्दा रहेकै बेला माओवादी केन्द्रबाट उपाध्याय अध्यक्षमा निर्वाचित भएका हुन् । उनी निर्वाचित भएपछि पनि शपथग्रहण रोकिएको थियो । तर, कानूनी रुपमा सपथ लिन मिल्ने भन्दै केही दिनपछि शपथग्रहण भएको थियो ।

अध्यक्षमा सपथग्रहण गरेको केही समयपछि पुनः आयोगले उनलाई निलम्बनमा राख्न सम्बन्धित निकायलाई पत्र काटेको थियो । उनी निलम्बनमा परे पनि मुख्य निर्वाचन अधिकृतको कार्यालयले उनको नाम नहटाएको भन्दै एमालेले विरोध गरेको छ ।