मन्त्री आले र स्पेनी राजदूतबीच नेपाल-स्पेन पर्यटनसम्बन्धी छलफल

काठमाडौँ । संस्कृति, पर्यटन तथा नागरिक उड्डयनमन्त्री प्रेमबहादुर आले र नेपालका लागि स्पेनका राजदूत जोसेमारिया र्याडाओ डोमिनगेजुबीच आज मन्त्रालयमा छलफल भएको छ । दुईबीच नेपाल र स्पेनको द्विपक्षीय सम्बन्ध तथा सांस्कृतिक, पर्यटकीय क्षेत्रका विषयमा छलफल भएको हो ।

उक्त भेटवार्ता एवं छलफलका क्रममा मन्त्री आलेले स्पेनका नागरिकलाई नेपालका पर्यटकीय क्षेत्र तथा हिमशृङ्खला अवलोकन गर्न आउन आग्रह गरेका छन् । उनले भने, “नेपालमा कोरोना सङ्क्रमण दर करिब–करिब अन्त्य भइसकेको छ, स्पेनका नागरिकलाई यहाँका पर्यटकीय क्षेत्र अवलोकनका लागि आउन आग्रह गर्दछौँ ।”

सोही क्रममा मन्त्री आलेले जलवायु परिवर्तनका विषयमा स्पनेले लिएको नेतृत्व स्वागतयोग्य रहेको समेत बताएका छन् । यसैगरी, उनले हालै नेपालले ‘आइकाओ सेफ्टी अडिट’मा गरेको उल्लेखनीय प्रगतिका बारेमा राजदूत डोमिनगेजुलाई जानकारी गराए। भेटवार्ताका क्रममा मन्त्री आलेले स्पेन नेपालको महत्त्वपूर्ण विकास साझेदार रहेको उल्लेख गर्दै नेपाललाई कोभिड–१९ तथा महाभूकम्पका बखत संयुक्त राष्ट्रसङ्घमा सहयोगका लागि लिएको कदमका लागि धन्यवादसमेत ज्ञापन गरे ।

सोही छलफल एवं भेटवार्ताका क्रममा स्पेनका राजदूत डोमिनगेजुले नेपाल र स्पेनबीच सुमधुर सम्बन्ध रहेको साथै सांस्कृतिक तथा व्यापारिक सम्बन्धमा थप विस्तार गरी सम्बन्ध थप सुदृढ गर्न सकिने बताए । उनले भने, “नेपाल–स्पेनबीच सुमधुर सम्बन्ध रहेको छ, हामी आवश्यकता परेका बखत नेपाललाई थप विकासका काम सहयोग गर्न तयार रहेका छौँ ।”

यसैगरी, राजदूत डोमिनगेजुले वातावरण तथा जलवायुजस्तो महत्त्वपूर्ण विषयमा स्पेन संवेदनशील रहेको र सो सम्बन्धी सहयोग र सहकार्यका लागि तयार रहेको मन्त्री आलेसमक्ष जानकारी गराए ।