एसियन कप छनोट : इन्डोनेसियासँग नेपाल ७-० ले पराजित

काठमाडौँ । एएफसी एसियन कप छनोटको तेस्रो चरणको अन्तिम खेलमा नेपालले इन्डोनेसियासँग लज्जास्पद हार खेपेको छ । कुवेतको जाबिर अल अहमद स्टेडियममा गएराति भएको खेलमा नेपाल इन्डोनेसियासँग ७-० गोलले पराजित भएको हो ।

१० खेलाडीमा समेटिएको नेपालमाथि इन्डोनेसियाले खेलभर दबदबा कायम राख्यो । पहिलो हाफमा दुई गोल खाएको नेपालले दोस्रो हाफमा पाँच गोल व्यहोरेको थियो । लगातार तेस्रो हारसँगै समूह ‘ए’ मा नेपाल तालिकाको अन्तिममा रह्यो ।

नेपाल पहिलो खेलमा जोर्डनसँग २-० र दोस्रो खेलमा कुवेतसँग ४-१ गोलले पराजित भएको थियो । जोर्डन नौ अंक सहित समूह ‘ए’ को विजेता बन्दै एसियन कपमा छनोट भयो । ६ अंक बनाएको इन्डोनेसिया दोस्रो र तीन अंकसहित कुवेत तेस्रो स्थानमा रह्यो ।

एएफसीका अनुसार समूहको शीर्षटोली र पाँच समूहको उत्कृष्ट उपविजेता टोली सन् २०२३ मा चीनमा आयोजना हुने एसियन कपका लागि छनोट हुनेछन् ।