पिएसजीको मुख्य प्रशिक्षकमा गाल्टिएर नियुक्त

काठमाडाैँ । फ्रान्सेली लिग वान क्लब पेरिस सेन्ट जर्मेन (पिएसजी) ले क्रिस्टोफ गाल्टिएरलाई मुख्य प्रशिक्षकमा नियुक्त गरेको छ । पिएसजीले मंगलबार पत्रकार सम्मेलनको आयोजना गर्दै आफ्ना नयाँ प्रशिक्षक क्रिस्टोफेलाई भित्र्याएको जानकारी दिएको हो ।

यसअघि मंगलबार नै पिएसजीले अर्जेन्टिनी प्रशिक्षक माउरिसियो पोचेट्टीनो औपचारिकरुपमा क्लबबाट बिदा भएको जानकारी दिएको थियो । पोचेट्टीनोलाई पिएसजीले च्याम्पियन्स लिगको असफलतापछि हटाएको हो । पोचेट्टीनो जनवरी २०२१ मा पिएसजीको प्रशिक्षक बनेका थिए । उनको नेतृत्वमा पिएसजी च्याम्पियन्स लिगमा असफल भएपनि यस सिजनको फ्रेन्च लिगको उपाधि जितेको थियो ।

त्यसैगरी पिएसजीमा आउन लागेका क्रिस्टोफे भने हाल फ्रेन्च लिगकै क्लब नीसका प्रशिक्षक हुन् । उनको नेतृत्वमा नीस यस बर्षको कोपा डे फ्रान्सको फाइनलमा पुगेको थियो । यस अघि उनी फ्रेन्च क्लब लिलेका प्रशिक्षक थिए । उनको नेतृत्वमा लिलेले २०२०-२१ को फ्रेन्च लिगको उपाधि जितेको थियो ।