विराटनगर महानगरको आगामी आर्थिक वर्षको बजेट सर्वसम्मतिले पारित
विराटनगर । विराटनगर महानगरपालिकाको आगामी आर्थिक वर्षको बजेट सर्वसम्मतिले पारित भएको छ । शनिबार बसेको १० औं नगर सभाको दोस्रो बैठकले आगामी आर्थिक वर्षको बजेटसँगै नीति तथा कार्यक्रम पारित गरेको हो । महानगरले असार १० गते आगामी आर्थिक वर्षका लागि ३ अर्ब ६२ करोड ५५ लाख ६७ हजार रुपैयाँको बजेट सार्वजनिक गरेको थियो ।
आय स्रोत कमजोर हुँदा विराटनगर महानगरपालिकाले आर्थिक वर्ष ०७९÷८० को बजेट आर्थिक वर्ष ०७८÷७९ कोभन्दा १५ प्रतिशतले कम सार्वजनिक गरेको छ । शनिबार बसेको नगर सभाले मेयर नागेश कोइरालाको अनुमतिले उपमेयर शिल्पा निराला कार्कीले प्रस्तुत गरेको आगामी आर्थिक वर्षको आर्थिक विधेयक, विनियोजन विधेयक र महानगर खेलकुद विकास विधेयक पनि सर्वसम्मतिले पारित गरेको छ ।
त्यसैगरी केही महत्त्वपूर्ण नीतिगत निर्णयहरूसमेत गरेको प्रमुख प्रशासकीय अधिकृत उमेश बस्नेतले जानकारी दिए । नगर सभाले उपमेयर शिल्पा निराला कार्कीको संयोजकत्वमा न्यायिक समिति र महानगर सदस्य बलराम कारञ्जितको संयोजकत्वमा लेखा समिति पनि गठन गरेको छ ।
न्यायिक समितिको संयोजक उपमेयर हुने संवैधानिक व्यवस्था छ । न्यायिक समितिको सदस्यमा वडा नम्बर ११ का अध्यक्ष तीथेन्द्र न्यौपाने र वडा नम्बर ९ की सदस्य रुपा देउजा चयन हुँदा लेखा समितिको सदस्यमा २ नम्बर वडाकी सदस्य मेनुका परियार र ९ नम्बर वडाका सदस्य रियाज अहमदलाई बैठकले सर्वसम्मतिले चयन गरेको बस्नेतले जानकारी दिए ।
नगर सभालाई सम्बोधन गर्दै मेयर नागेश कोइरालाले महानगरको आफ्नो स्रोतले मात्रै समग्र विराटनगरको विकास नहुने धारणा राखे । सबै वडालाई धेरैभन्दा धेरै बजेट छुट्याएर समग्र विराटनगरको विकास गरौं भन्ने इच्छा र चाहना हुँदा हुँदै पनि नगरपालिकाको क्षमता र आर्थिक अवस्था कमजोर रहेको बताए ।
उनले राजस्व संकलनलाई १ अर्ब नकटाउँदासम्म सोचेजस्तो विकास गर्न नसकिने स्पष्ट पारे । मेयर कोइरालाले भौतिक संरचना निर्माणसँगै खानेपानी, सरसफाइ, डुबान समस्या समाधानका लागि बजेटका विषयमा दातृ निकायहरूसित छलफल भइरहेको बताए ।
उपमेयर कार्कीले महानगरको आर्थिक अवस्था बलियो बनाउनुपर्नेमा जोड दिइन् । करको दायरामा नआउने धेरै रहेकोले सबैलाई करको दायरामा ल्याई आन्तरिक स्रोतलाई बलियो बनाउनु पर्नेमा जोड दिइन् ।
बैठकमा वडा नम्बर ४ का वडाध्यक्ष जितन थापा, वडा नम्बर ५ की वडा सदस्य अन्जु दाहाल, वडा नम्बर ११ का सदस्य बलराम कारञ्जित, वडा नम्बर ७ का वडाध्यक्ष जितेन्द्र अग्रवाल, वडा नम्बर १ की सदस्य लक्ष्मीदेवी राईलगायतले सडक बत्ती, सरसफाइ, डुबान समस्या, जनप्रतिनिधिका सेवा सुविधालगायतका विषय उठाएका थिए।
