हत्या आरोपमा श्रीमतीसहित दुई जना पक्राउ

सोलुखुम्बु । सोलुखुम्बुमा श्रीमानको  हत्या आरोपमा  श्रीमतीसहित दुई जना पक्राउ परेका छन् । सोलुखुम्बुको सोलुदुधकुण्ड नगरपालिका९५ का ५७ वर्षीय सुब्बा कामीको हत्या आरोपमा कामीकै श्रीमती र अर्की एक जना महिलालाई जिल्ला प्रहरी कार्यालय सोलुखुम्बुले पक्राउ गरेको छ ।

असार २५ गते राती श्रीमान् श्रीमतीसँगै सुतेकोमा २६ गते बिहान श्रीमान् मृत अवस्थामा रहेको भन्ने खबर प्राप्त भएसँगै जिल्ला प्रहरी कार्यालय सोलुखम्बुबाट खटिएको प्रहरी टोलीले अनुसन्धान शुरु गरेको थियो ।

अनुसन्धानको क्रममा कामीलाई उनकै श्रीमती ५५ वर्षीय बुदामाया विक र स्थानीय ५३ वर्षीय ङिमा तामाङले हत्या गरेको जिल्ला प्रहरी कार्यालय सोलुखुम्बुले जनाएको छ ।

हत्यामा संलग्न रहेको आरोपमा प्रहरीले  दुवै जनालाई प्रहरीले पक्राउ गरेको छ । पक्राउ परेका दुवै जनाबारे थप अनुसन्धान भइरहेको प्रहरीले जनाएको छ ।