अपहरण गरी हत्या गरेको अभियोगमा २ जना पक्राउ
मकालु खबर
पर्सा । अपहरण, शरीर बन्धक गरी बारा विश्रामपुर गाउँपालिका ५ इटियाही बस्ने २३ वर्षीय राजकुमार ठाकुरको हत्या गरेको अभियोगमा २ जनालाई प्रहरीले पक्राउ गरेको छ ।
पक्राउ पर्नेहरूमा बारा विश्रामपुर गाउँपालिका(५ ठेगाना भएका २८ वर्षीय उत्तम पटेल र सोही ठाउँ ठेगाना भएका ३० वर्षीय प्रतितम पटेल रहेका छन् । उनीहरूलाई शनिवार प्रहरीले पक्राउ गरेको हो ।
राजकुमार ट्युसन पढ्न पर्सा वीरगन्ज महानगरपालिका १६ नगवातर्फ साइकल चढी गएकोमा सम्पर्क विहीन भएको भन्ने सूचनाको आधारमा जिल्ला प्रहरी कार्यालय पर्साबाट खटिएको प्रहरीले घटनाको अनुसन्धानका लागि वीरगन्जमा महानगरपालिका(१६ नगवास्थितमा टेलर सञ्चालन गरी बस्दै आएका उत्तम पटेल र उनकै दाइ प्रतितम पटेललाई नियन्त्रणमा लिएको थियो ।
थप अनुसन्धानको क्रममा राजकुमार र उनीहरूकै बहिनीबिच प्रेम सम्बन्ध रहेको शङ्कामा राजकुमारलाई आफ्नै टेलरमा लगी हत्या पश्चात् शव बोराभित्र राखी ना ३८ प ४३९५ नम्बरको मोटरसाइकलमा भारतको रक्सौल रेल्वे स्टेसन पुर्याई मुजफ्फरपुर जाने ट्रेनको शौचालय छेउको खाली ठाउँमा छोडेको खुल्न आएको छ ।
उनीहरू विरुद्ध अपहरण तथा शरीर बन्धक र ज्यान सम्बन्धी कसुर (कर्तव्य ज्यान) मुद्दामा थप अनुसन्धान भइरहेको छ ।
मकालु खबर
