सुरू भयाे नेपालमै पहिलाे विद्युतीय सवारी मेला : नाडा ईभी एक्स्पो

काठमाडाैँ । नेपालको इतिहासमै पहिलो नाडा ईभी एक्स्पो सुरु भएको छ । बिहीबार काठमाडौँको भृकुटीमण्डपमा ४ दिने नाडा ईभी एक्स्पो सुरु भएको हो   अर्थमन्त्री जनार्दन शर्माले पहिलो नाडा ईभी एक्स्पोको शुभारम्भ गरेका छन् ।

‘नेपालमा पहिलो पटक भृकुटी मण्डपमा सुरुवात भएको छ,’ नाडा अध्यक्ष धुब्र थापाले भने,‘नेपालमा विद्युतीय सवारी साधनको अपरिहार्यतालाई महसुस गर्दै नाडा ईभी एक्स्पो शुभारम्भ भएको हो ।’

विद्युतीय सावरी साधनको महत्त्व बढ्दै गएको बताउँदै अध्यक्ष थापाले प्रदूषण कम गर्ने मात्र नभई विद्युत् खपतमा सहयोग पुग्ने बताए । वातावरणमैत्री विद्युतीय सवारी साधनको प्रयोगले पेट्रोलियम पदार्थको खपत कम गर्ने भएकाले ग्रिन नेपालको अवधारणा साकार हुने नाडाको ठहर छ।

सरकारले विद्युतीय सवारी साधन प्रवर्द्धन गर्ने बताई रहँदा १०० किलोवाट माथिका गाडीमा कर बढाउनु उपयुक्त नभएको बताएका थिए।

‘सरकारले १०० किलोवाट माथिका गाडीमा कर बढाउँदा प्रोत्साहनको सट्टा निरुत्साहन भएको छ,’ अध्यक्ष थापाले अर्थमन्त्रीलाई इङ्गित गर्दै भने,‘नेपालको भौगोलिक अवस्था अनुसार २०० किलोवाट क्षमतासम्मका गाडीलाई पुरानै व्यवस्था अनुसार कर कायम गरिदिन अनुरोध गर्दछु।’

सरकारले नेपालमै गाडी एसम्बल गर्न आग्रह गरे पनि त्यसकालागि स्थिर नीति आवश्यक रहेको नाडाले उल्लेख गरेको छ। अध्यक्ष थापाले सरकारले स्थित नीति लिए व्यवसायी पार्ट पुर्जाको उद्योग समेत खोल्न तयार रहेको बताए।

अर्थमन्त्री जनार्दन शर्माले ईभी एक्स्पो नाडाको मात्रै नभई देशकै भएको बताए। मन्त्री शर्माले नेपालमा विद्युतीय गाडी प्रवर्द्धन गर्ने सरकारको नीतिबाट पछि नहट्ने बताएका छन्।

‘विद्युतीय गाडीलाई प्रवर्द्धन गर्दै आएका छौँ। त्यसबाट पछि हट्दैनौँ,’ मन्त्री शर्माले भने,‘अब कोइला, डिजेल, पेट्रोलको युग सकियो अब ईभी, हाइड्रोजन तर्फ गइरहेका छौँ।’

अर्थमन्त्री शर्माले सरकारले निश्चित अवधिपछि विद्युतीय सवारी चल्ने मात्रै व्यवस्था गर्न लागेको बताएका छन्। पेट्रोलियम पदार्थबाट चल्ने सवारी कहिले रोक्ने भन्ने विषयमा अध्ययन गरिरहेको जानकारी दिए ।

 ‘गाडी उत्पादन यही गर्नुहोस्  विद्युत् र ब्याजमा थप सहुलियत दिनुपर्छ,’ उनले भने,‘एसेम्बल उद्योगमा भ्यालु एड कसरी गर्न सकिन्छ । त्यसमा ध्यान दिनुस् ।’

उद्योग वाणिज्य महासंघका अध्यक्ष शेखर गोल्छाले सरकारको सहुलियतका कारण ३०–३५ लाखमै गाडी पाउने अवस्था रहेको बताएका छन् ।

अध्यक्ष गोल्छाले सरकारको नीति स्थिर रहनु पर्ने बताउँदै अन्तःशुल्क र भन्सार महशुल बढाउन नहुने उल्लेख गरे  । वातावरण संरक्षण गर्नको लागि विद्युतीय गाडीलाई प्रोत्साहन गर्नु पर्ने धारण व्यक्त गरे ।

नाडा अध्यक्ष थापाले सरकारले गाडी आयातमा प्रतिबन्ध लगाउँदा ९ महिना देखी अटो व्यवसायी मारमा परेको जानकारी गराए। कार,  जिप, भ्यान र १५० सिसी माथिका मोटरसाइकल आयात खुल्ला गर्न अर्थमन्त्रीसँग माग गरेका थिए । अर्थमन्त्री शर्माले सवारी प्रतिबन्ध लामो समय नरहने अर्थमन्त्री शर्माले बताए । उनले अर्थतन्त्र सुधार तर्फ गइरहेको बताउँदै निर्यात वृद्धि गरी आयात खोल्नु पर्ने उल्लेख गरे ।

नाडाले १९९८ देखी नै नाडा अटो शो गर्दै आएको छ । नाडा ईभी एक्स्पो पहिलो पटक हुन लागेको छ । नाडा ई भी एक्स्पोका सभापति अनुप बरालले एक्स्पोमा ५१ वटा स्टल रहेको जानकारी दिए । उनका अनुसार नाडा ईभी एक्स्पोमा ९ वटा ४ पाङग्रे र १ वटा ३ पाङग्रे रहेका छन् । १६ वटा २ पाङ्ग्रे सवारीका स्टल रहेका छन् ।

गाडी ब्रान्डमा टाटा, हुन्डाई, टेस्ला, नेटा, बीवाईडी, चांगन, ज्यागका चार पाङ्ग्रे विद्युतीय गाडीको सहभागिता रहेको छ।  अग्नी ग्रुपले ३ पाङ्ग्रे टेरो ब्रान्ड सहभागिता हुनेछ ।

दुई पाङ्ग्रे ब्रान्ड रहेका छन् । जसमा लेभ्निङ, एनआईयु, यडिया, ओला, सुपर सोको, हिरो इलेक्ट्रिक, दुहान, जोय, सेगवे, आईमा, टेलजी, पियोर, लेक्ट्रो, रेमोटर्स लगायतका ब्रान्डको उपस्थिति रहेको छ ।

चापको व्यवस्थापनको लागि नाडाले खल्ती एप मार्फत टिकट काट्न सकिने व्यवस्था गरेको छ । एक्स्पोमा प्रवेशको लागि विद्यार्थीलाई १५० रुपैयाँ र सर्वसाधारणको लागि २०० रुपैयाँ व्यवस्था गरेको छ ।

सिएट द्वारा प्रायोजित नाडा सवारी साधन, पार्ट पुर्जा, वित्तीय सेवा उपलब्ध रहेका छन् । एक्स्पोको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेजले गरी रहेको छ ।

नाडाले १० प्रतिशत बजार हिस्सा ओगटी सकेको छ । अबको ५–६ वर्षमा ५० प्रतिशत बढी हिस्सा हुने आकलन गरिएको छ ।

नेपाली चाड–पर्वहरुको पूर्वाधारमा आयोजना हुन गइरहेको यस एक्स्पोले नेपालमा विद्युतीय सवारी साधनबारे अत्यधिक जनचेतना अभिवृद्धि गर्न एवं सम्बन्धित सम्पूर्ण अटो व्यवसायीहरूको समष्टिगत प्रवर्द्धनमा प्रत्यक्ष तथा सकारात्मक प्रभाव पार्ने नाडाको विश्वास छ ।

नाडाले विद्युतीय गाडीको एक्स्पो मात्रै नभई विद्युतीय गाडीको जानकारी दिन ३ दिन ई भी चौतारी समेतको आयोजना गर्दै छ । शुक्रबारको गोष्ठीमा प्रविधि र ईको सिस्टमको विषयमा छलफल हुँदै छ ।

जसमा वन तथा वातावरण सचिव प्रेम नारायण कँडेल रहने छन् भने यातायात व्यवस्था विभागका रामचन्द्र पौडेल, अनुसन्धान कर्ता शिर्पा श्रेष्ठ, अभियान्त्रिकी कर्मशालाका सिईओ अभिषेक कार्की, सिप्रदिका दिनेश पौडेल र नेपाल विद्युत् प्राधिकरणका सागर ज्ञवाली प्यानलिस्ट रहेका छन् । युएसएड क्लिन एयरको सहयोगमा भइरहेको ईभी चौतारीमा भूषण तुलाधर मोडरेट रहेका छन् । नाडाको पहलमा आजबाट प्रदर्शनी स्थल भृकुटी मण्डपमा रक्तदान कार्यक्रम समेत सञ्चालन हुँदैछ ।