नेयमार र रिचार्लीसन चम्कँदा ब्राजिलको सहज जित

काठमाडाैँ । फरवार्ड नेयमारले दुई असिस्ट तथा रिचार्लीसनले दुई गोल गरेपछि कतार विश्वकपअघिको मैत्रीपूर्ण खेलमा ब्राजिलले सानदार जित निकालेको छ । ब्राजिलले अफ्रिकी राष्ट्र घानामाथि ३-० को सहज जित निकालेको हो ।

फ्रान्सको ले हाभ्रेमा गएराति भएको खेलमा ब्राजिलले पहिलो हाफको ३९ मिनेटभित्रै ३-० को आरामदायी अग्रता लिइसकेको थियो । त्यही तीन गोल नै ब्राजिलको जितमा पर्याप्त बन्यो ।

खेलको सुरुवातदेखि नै बल पोसेसन राख्दै खेलमा पकड बनाएको ब्राजिलले नवौं मिनेटमा मार्किन्हसको गोलबाट अग्रता लिएको थियो । उनले राफिन्हाको पासमा गोल गर्न सफल भएका थिए । २८औं मिनेटमा रिचार्लीसनले गोल गर्दै ब्राजिलको अग्रता दोब्बर पारे । उनले नेयमारको पासमा गोल गर्न सफल भए । ३९औं मिनेटमा नेयमारकै पासमा रिचार्लीसनले गोल गर्दै ब्राजिललाई ३-० ले अघि बढाए ।

दोस्रो हाफमा दुवै टोलीले केही अवसर सिर्जना गरेपनि थप गोल निस्कन नसक्दा ब्राजिल सहज जित निकाल्न सफल भयो । अब ब्राजिलले कतार विश्वकप २०२२ अघिको अन्तिम मैत्रीपूर्ण खेलमा ट्युनिसियासँग बुधबार प्रतिस्पर्धा गर्दैछ ।