लिभरपुलको सहज जित

काठमाडौँ । युइएफए च्याम्पियन्स लिग अन्तर्गत लिभरपुलले रेन्जर्समाथि सहज जित हासिल गरेको छ । गएराती सम्पन्न समुह ए अन्तर्गतको खेलमा लिभरपुलले रेन्जर्सलाई २-० गोल अन्तरले पराजित गरेको हो ।

लिभरपुलको जितमा ट्रेन्ट अलेक्जेन्डर आर्नोल्ड र मोहमद सलाहले एक एक गोल गरेका थिए । यो जितपछि लिभरपुल ३ खेलमा २ जित र एक हारसहित ६ अंक बटुल्दै समुह ए मा दोस्रो स्थानमा रहेको छ ।

त्यस्तै रेन्जर्सको भने यो लगातार तेस्रो हार हो । यसै समुह अन्तर्गत गएराती नै सम्पन्न खेलमा नापोलीले अयाक्सलाई ६-१ गोल अन्तरले पराजित गरेको थियो । यो जितपछि नापोली तिनै खेल जितेर ९ अंकसहित समुहमा शिर्ष स्थानमा रहेको छ भने अयाक्सको ३ खेलमा एक जित र २ हारसहित ३ अंक रहेको छ ।