भारतीय काङ्ग्रेसको नयाँ अध्यक्षमा खड्गे निर्वाचित

नयाँ दिल्ली । भारतको विपक्षी दल, राष्ट्रिय काङ्ग्रेस पार्टी (आईएनसी) को अध्यक्षमा मल्लिकार्जुन खड़गे निर्वाचित भएका छन् ।
आईएनसीले मल्लिकार्जुन खड़गेलाई पार्टीको अध्यक्षमा निर्वाचित गरेको पार्टीका नेता मधुसुदन मिस्त्रीले बुधबार जानकारी दिएका हुन् ।

निर्वाचन अधिकृत मिस्त्रीले सञ्चारकर्मीसँग भने, “कूल नौ हजार ३८५ मत खसेको नेतृत्व चयनका लागि भएको निर्वाचनमा खड्Þगेलाई सात हजार ८९७ मत प्राप्त भएको छ । उनीसँग अध्यक्षका लागि प्रतिस्पर्धा गर्नुभएका काङ्ग्रेस नेता शशि थरूरले एक हजार ७२ मत प्राप्त गरेका छन् । साथै, खसेको कूल मतमध्ये ४१६ मत बदर भएको छ ।”

निर्वाचन अधिकृत मिस्त्रीले सञ्चारकर्मीसँग भने, “थरुरले हार स्वीकार गर्दै खड़गेको सफलताको कामना गर्नुभएको छ । नेतृत्व चयनका लागि भएको निर्वाचनमा प्राप्त अत्यधिक बहुमतसँगै खड़गे २४ वर्षमा पहिलो पटक गैर–गान्धी परिवारबाट काङ्ग्रेसको नेतृत्वमा चयन हुनुभएको छ ।”

गान्धी परिवारले आफूलाई शीर्ष पदबाट अलग गरेको छ र मतदानमा कुनै पनि उम्मेदवारलाई समर्थन नगरेको बताइएको छ ।