जयप्रकाशलाई बधाई दिँदै गुरुराजले भने ‘जनताको मतको कदर गर्छु’

विराटनगर । मोरङ क्षेत्र नम्बर ४ (१) बाट नेकपा एमालेका उम्मेदवार जय प्रकाश चौधरी निर्वाचित भएपछि उनका प्रत्याशी नेपाली काँग्रेसका गुरुराज घिमिरेले जनताको जनमतको कदर गर्ने बताएका छन् ।

जनता भगवान् भएको भन्दै उनले जनताले दिएको मतलाई सम्मान गर्दै निर्वाचित चौधरीलाई सहयोग गरेर जाने बताए ।

उनले पछिल्लो समय युवाको चाहना अनुसार चौधरीको जीत भएको बताउँदै घिमिरेले पराजयलाई आफूले एउटा पाठको रूपमा सिकाई भएको सुनाए । ‘जीत र हारलाई सहज रूपमा स्वीकार गर्नु पर्छ , उनले भने, प्रदेश सभामा आफ्नो अनुभव र ज्ञानको आधारमा चौधरीलाई सघाएर जानेछु ।’ प्रभावकारी नेतृत्व प्रदान गर्न उनले चौधरीलाई शुभकामना दिएका छन् । निर्वाचित भएका चौधरीले आफ्नो अभिभावकको रूपमा घिमिरेलाई सँगै लिएर अघि बढ्ने बताए ।

आगामी ५ वर्ष आफ्नो कार्यकालमा नागरिकको अपेक्षा र भावना अनुसार काम गरेर जाने चौधरीको भनाई छ। सामाजिक क्षेत्रबाट राजनीतिमा आएका चौधरीले १५४६५ मत ल्याएर निर्वाचित भएका हुन् । उनका निकटतम प्रतिद्वन्द्वी नेपाली काँग्रेसका गुरुराज घिमिरेले १५०५९ मत प्राप्त गरेका छन् ।

निर्वाचन अधिकृतको कार्यालयले अधिकारीक विवरण घोषणा गरेको छैन ।