दोस्रो पटक मेयरको टिकट नपाएका भीम पराजुली प्रदेश सभा सदस्यमा निर्वाचित

विराटनगर । नेपाली कांग्रेसका केन्द्रीय सदस्य भीम पराजुली प्रदेश सभा सदस्यमा निर्वाचित भएका छन् । पराजुलीले पूर्व सामाजिक विकास मन्त्री एमालेका नेता जीवन घिमिरेलाई पराजित गरेका हुन् ।

पराजुलीले ११४७९ मत प्राप्त गर्दा घिमिरेले ९६११ मत मात्र प्राप्त गर्न सके । पराजुलीले निर्वाचित भएसँगै विराटनगरको विकास गर्ने बताए । २०७४ सालको निर्वाचनमा विराटनगरको मेयर भएका पराजुलीले मेयर नै दोहोर्‍याउन टिकटका लागि ठुलो रस्साकस्सी गरेका थिए ।

त्यसपछि उनले प्रतिनिधि सभा क्षेत्र नम्बर ४ को लागि टिकटको कसरत गरेपनि पार नलागेपछि प्रदेश सभामा उम्मेदवारी दिएका थिए । नेपाली कांग्रेसको केन्द्रीय समितिको बैठकमा पराजुलीले प्रदेश संरचना खारेज र हिन्दु राष्ट्रको पक्षमा भनाई सार्वजनिक गरेका थिए ।