हुलाकी सडक निर्माणको माग गर्दै मुसैलीमा चक्काजाम

मलङ्गवा । हुलाकी सडक निर्माणको काम अगाडि बढाउने सहमति भएपछि आज बिहानैदेखि चक्काजाम गरिएको सडक साँझदेखि सञ्चालनमा आएको छ ।

हुलाकी सडक निर्माणको माग गर्दै मलङ्गवा नगरपालिका–७, मुसैलीका स्थानीयवासीले आज बिहानैदेखि सडक अवरुद्ध गरेका थिए ।

पूर्वसहमतिअनुसार हुलाकी सडकको काम अगाडि नबढाइएको भन्दै स्थानीयवासीले सडक अवरुद्ध गरेपछि ठेकेदारका प्रतिनिधि र स्थानीयवासीबीच सडकको काम अगाडि बढाउने पुनः सहमति भएपछि सडक सञ्चालन गरिएको स्थानीय सुजित यादवले जानकारी दिए ।

अलपत्र अवस्थामा छाडिएको हुलाकी सडकको धुलोले हैरान भएको भन्दै स्थानीयवासीले सडकमा टायर बालेर चक्काजाम गरेका थिए । स्थानीयवासीले पटकपटक आवश्वास पाउँदा पनि हुलाकी सडक कालोपत्र नभएकाले बाध्य भएर चक्काजाममा उत्रनुपरेको स्थानीय सन्तोष महतोले बताए ।

“हुलाकी सडक निर्माणका लागि केही दिनअघि ‘नो रोड, नो भोट’को नारा लगाउँदै आन्दोलन गरेका थियौँ, मङ्सिर २१ अघि नै सडकको काम अगाडि बढाउने ठेकेदारले सहमति गरेको थियो”, उनले भने, “ठेकेदारले काम पनि अगाडि बढाएन, अनि नेताले भोट लिएर जितेर गयो, हामी जनता धुलोमा छौँ ।”

केही दिनअघि कौडेना बजारका स्थानीयवासीले हुलाकी सडक निर्माणको माग गर्दै ‘नो रोड, नो भोटको’ नारा लगाउँदै चक्काजाम गरेका थिए । चक्काजाम गरिएपछि कौडेना बजार क्षेत्रलगत्तै सडक कालोपत्र गरिएको थियो । तर हुलाकी सडकको अन्य खण्डको कालोपत्र गरिएको छैन ।

स्थानीयवासीको प्रदर्शनपछि त्यहाँ सडक कालोपत्रको थोरै काम भएको छ । वर्षौंदेखि जरजर अवस्थामा रहेको हुलाकी सडकमा अहिले कुहिरीमण्डल भएर धुलो उड्दा स्थानीयवासी प्रभावित भइरहेका छन् ।