फाइनल पुगेपछि मेस्सीले भने- ‘यो मेरो अन्तिम विश्वकप हो’

काठमाडौँ । अर्जेन्टिनाका स्टार फुटबलर लियोनल मेस्सीले कतारमा जारी फिफा विश्वकप आफ्नो अन्तिम विश्वकप हुने बताएका छन् । गएराति क्रोएसियालाई ३-० ले हराएर फाइनलमा स्थान बनाएपछि मेस्सीले यस्तो बताएका हुन् ।

खेलपछि मेस्सीले भने, ‘विश्वकपमा फाइनल खेलेर आफ्नो यात्रा समाप्त गर्न पाउँदा निकै खुसी छु । यो वास्तवमा निकै सुखद छ । यो विश्वकपमा जे भयो, त्यो निकै भावनात्मक रह्यो । अर्जेन्टिनाका मानिसहरूले यसको कति आनन्द लिनुभयो भनेर हेर्नु पनि निकै सुखद रह्यो । अर्को विश्वकप आउन अझै लामो बाटो छ । म त्यति लामो समयसम्म गर्न सक्छु जस्तो लाग्दैन । यसरी विश्वकपको यात्रा समाप्त गर्नु शानदार हो ।’

३५ वर्षीय मेस्सीको यो पाँचौं विश्वकप हो । उनले गत वर्ष कोपा अमेरिकाको उपाधि पनि जितेका थिए । अब विश्वकप फाइनल डिसेम्बर १८ मा आइतबार हुनेछ । त्यसअघि दोस्रो सेमिफाइनल मोरक्को र डिफेन्डिङ च्याम्पियन फ्रान्सबीच हुनेछ ।