नेहा चौधरीका ससुराले छोरालाई छुटाउन अदालतमा हाले मुद्दा
जनकपुरधाम । दाइजोको निहुँमा घरबाट निकालिएकी नेहा चौधरीका ससुरा रामप्रेश चौधरीले छोरा डा. पंकजलाई छुटाउन अदालत पुगेका छन् । रामप्रवेशले बिहीबार उच्च अदालत जनकपुरमा छोरा डा। पंकजलाई छुटाउन बन्दी प्रत्यक्षीकरण मुद्दा दर्ता गराएका हुन् । घरेलु हिंसा गरेको आरोपमा नेहाले जिल्ला अदालत महोत्तरीमा दर्ता गराएको मुद्दामा उनका श्रीमान् डा. पंकज पक्राउ परेका हुन् । पङ्कजलाई तीन दिनअगाडि महोत्तरी प्रहरीले नियन्त्रणमा लिए ।
अहिले जिल्ला प्रहरी कार्यालयमा राखेर उनीमाथि प्रहरीले अनुसन्धान गरिरहेको छ । नेहाले भने श्रीमान् डा. पंकज, ससुरा रामप्रवेश र सासुसहित उनका परिवारका ६ जनामाथि घरेलु हिंसा र दाइजो विरुद्धको मुद्दा दर्ता गराएकी हुन् । पंकज पक्राउ परे पनि ससुरा, सासु सहित अन्य सबै फरार छन् । तर, फरार रहेकै अवस्थामा रामप्रवेशले छोरालाई छुटाउन अदालत पुगेर बन्दी प्रत्यक्षीकरण मुद्दा दर्ता गराए ।
नेहा भने ससुरा, सासुसहित दाइजोको निहुँमा यातना दिने सबैलाई पक्राउ गर्नुपर्ने माग गर्दै दुई दिनदेखि आन्दोलनरत थिइन् । आन्दोलनका क्रममा सवारी साधन तोडफोड गरेको आरोपमा नेहा र उनकी सहयोगी कुमारी आमा निहारिकालाई पनि प्रहरीले बिहीबार नियन्त्रणमा लियो । अहिले उनीहरू पनि प्रहरी हिरासतमै छन् ।
औरही नगरपालिका १ की नेहा र रामगोपालपुर ५ का डा. पंकजबीच गत फागुनमा विवाह भएको थियो । नेहाका परिवारले दाइजोमा ५१ लाख नगद र सुनचाँदी गरी करोडौँ दाइजो दिएको थियो । तर दाइजो कम भएको भनेर नेहालाई यातना दिएपछि यो घटनाले उग्ररुप लिएको छ ।
