प्रदेश १ का सांसदकाे सपथ ग्रहण ११ पुसमा हुने
विराटनगर । प्रदेश १ सभाका नवनिर्वाचित सदस्यहरुकाे सपथ ग्रहण कार्यक्रम ११ पुसमा हुने भएको छ । प्रदेश प्रमुखको कार्यालयले ५ पुस गते पठाएकाे पत्रअनुसार प्रदेश सभा सदस्यको लागि सपथ ग्रहण गराउने कार्यक्रम तय गरिएकाे प्रदेश सभा सचिवालयले जनाएको छ।
नेपालको संविधानको धारा १८२ को उपधारा(५), प्रदेश सभा सदस्य निर्वाचन ऐन २०७४ को दफा ७५ र प्रदेश सभाका पदाधिकारी तथा सदस्यको पारिश्रमिक र सुविधासम्बन्धी ऐन २०७५को दफा १९ बमोजिम प्रदेश १ को प्रदेश सभा सदस्य निर्वाचन २०७९ बाट निर्वाचित प्रदेश सभा सदस्यहरु मध्ये प्रदेश सभाको अध्यक्षता गर्ने जेष्ठ सदस्यहरुको रुपमा प्रदेश प्रमुखबाट सपथ ग्रहण गराउने र त्यसपछि जेष्ठ सदस्यले अन्य प्रदेश सभा सदस्यलाई सपथ गराउने कार्यक्रम तय भएको प्रदेश सभाका सचिव गोपालप्रसाद पराजुलीले जानकारी दिए ।
पहिलो प्रदेश सभाको निर्वाचन २०७४ मा ओमप्रकाश सराबगीले जेष्ठ सदस्यको रुपमा सपथ गराएका थिए ।
आगमी पुस ११ गते हुने सपथ ग्रहणमा प्रदेश सभाको सदस्यहरु मध्येबाट जेष्ठ सदस्यको हैसियतले मोरङ क्षेत्र नम्बर ५ (१) का गयानन्द मण्डलले सपथ गराउने समेत प्रदेश सभा सचिवालयले जनाएको छ।
जेष्ठ प्रदेश सभा सदस्य मण्डल वि.सं २००० सालका हुन् उनी अहिले ७९ वर्षका भएको प्रदेश सभाका सचिव पराजुलीले जानकारी दिए ।
