जेठाजुको हत्यामा संलग्न बुहारी पक्राउ

विराटनगर । झापामा जेठाजु हत्याको आरोपमा एक जनालाई प्रहरीले पक्राउ गरेको छ । कनकाई नगरपालिका-४ का ५५ वर्षीय पदमलाल बास्तोलाको हत्यामा संलग्न उनकै बुहारीलाई प्रहरीले पक्राउ गरेको हो ।

पक्राउ पर्नेमा (भाइ-बुहारी) कनकाई नगरपालिका-४ कि ४८ बर्षीया रनमाया बास्तोला रहेको जिल्ला प्रहरी कार्यालय झापाले जनाएको छ । पुस ७ गते बिहीबार शिवसताक्षी नगरपालिका-१० स्थित माईखोलाको बगरको काँस घारीमा पदमलाल बास्तोला मृत अवस्थामा फेला परेका थिए ।

घटनाको अनुसन्धानको क्रममा रनमाया बास्तोलाले पुस ६ गते मृतक बास्तोलासँगै घाँस काट्न गएको बेला हँसिया प्रहार गरी हत्या गरेको खुल्न आएको प्रहरीले जनाएको छ । प्रहरीले हत्यामा प्रयोग भएको हँसिया सहित पक्राउ परेकी रनमायालाई इलाका प्रहरी कार्यालय झिलझिलेको टोलीले नियन्त्रणमा लिएको जिल्ला प्रहरी कार्यालय झापाले जनाएको छ ।