आर्सनलको लगातार जित, लिगमा ७ अंकको स्पष्ट अग्रता

काठमाडौँ ।  इंग्लिस प्रिमियर लिग अन्तर्गत आर्सनलले ब्राइटनमाथि शानदार जित हासिल गरेको छ । गएराती सम्पन्न खेलमा आर्सनलले ब्राइटनलाई ४-२ गोल अन्तरले पराजित गरेको हो ।

आर्सनलको जितमा बुकायो साका, मार्टिन ओडेगार्ड, एडल एनकेटियाह र गाब्रियल मार्टिनेल्लीले एक एक गोल गरेका थिए । त्यस्तै ब्राइटनका लागि काओरु मिटोमा र इभान फर्गुसनले एक एक गोल गरेका थिए ।

यो जितपछि आर्सनलले प्रिमियर लिगमा आफ्नो अग्रता बढाएको छ । गएराती नै भएको अर्को खेलमा म्याचेस्टर सिटी एभर्टनसँग १-१ गोलको बराबरीमा रोकिएपछि आर्सनलले दोस्रो स्थानमा रहेको सिटीसँग ७ अंकको अग्रता बनाएको हो ।

आर्सनलको १६ खेलमा ४३ अंक भएको छ भने म्यानचेस्टर सिटीको १६ खेलमा ३६ अंक भएको छ । त्यस्तै ब्राइटनको भने १६ खेलमा २४ अंक छ र लिगमा आठौँ स्थानमा रहेको छ ।