प्रदेश १ सरकारमा एमाले र माओवादीको दाबी

विराटनगर । प्रदेश १ मा सरकार बनाउने नेकपा एमाले र नेकपा माओवादी केन्द्र दुबैले दाबी गरेका छन् । १३ जना प्रदेश सभा सदस्य बोकेर हिँडेको नेकपा माओवादी केन्द्रले प्रदेश नं. १ मा मुख्यमन्त्री आफूले पाउनुपर्ने दाबी गर्दै आएको छ । नेकपा एमाले प्रदेश १ मा सबैभन्दा ठूलो दल भएको कारण मुख्यमन्त्री आफूले पाउनेमा ढुक्क रहेको जनाउँदै आएको छ ।

प्रदेश १ मा नेकपा एमालेको ४० जना सांसद छन् । प्रदेश १ सभाको पहिलो प्रदेश सभा बैठकपछि पत्रकारसँग संक्षिप्त प्रतिक्रिया दिँदै नेकपा एमाले संसदीय दलका नेता हिक्मतकुमार कार्कीले प्रदेश १ मा नेकपा एमाले, माओवादी केन्द्र, राप्रपा, जसपा र एकीकृत समाजवादी मिलेर सरकार बन्ने दाबी गरे । उनले प्रदेशलाई बलियो बनाउने हो भने नेपाली कांग्रेससहित मिलेर सरकार बनाएर जानु पर्ने कार्कीको भनाई छ । सबैभन्दा ठुला दलको नेताको हैसियतले एमालेले प्रदेश सरकारको नेतृत्व लिने र नेपाली कांग्रेस पनि प्रदेश सरकारमा समाबेश गराउने बारे पनि छलफल गरिने कार्कीले बताए ।

नेकपा माओवादी केन्द्र प्रदेश १ संसदीय दलका नेता ईन्द्रबहादुर आङ्बोले यस अघिको सरकारको नेतृत्व एमालेलाई स्वीकार गरेर गएकोले अबको सरकारको नेतृत्व माओवादी केन्द्रले पाउनु पर्ने बताए । गष्ठबन्धनको माथिको निर्णय स्वीकार गरेर जाने बताएका आङ्बोले प्रदेश १ मा यस अघि एमालेलाई माओवादीले सघाएर गएकोले अब माओवादीलाई एमालेले सरकारको नेतृत्व दिएर जानु पर्ने उनको भनाइ छ।