सभामुख बन्न एमालेभित्र यी नेताको दौडधुप

विराटनगर । प्रतिनिधि सभाको सभामुखको दौडमा नेकपा एमालेबाट तीन नेता देखिएका छन् । देवराज घिमिरेसँगै छविलाल विश्वकर्मा र पृथ्वी सुब्बा गुरुङ पनि सभामुखको दौडमा देखिएका छन् ।

सभामुखको निर्वाचनको लागि सूचना प्रकाशित गर्न संसद् सचिवालयलाई जानकारी गराइएसँगै सभामुख बन्न नेताहरूको दौडधुप शुरु भएको हो । सभामुखको दौडमा रहेका नेकपा एमालेका देवराज घिमिरेले आफूले महत्त्वपूर्ण जिम्मेवारी पाउनेमा विश्वस्त रहेको बताउँछन् । ‘मैले यो पटक महत्त्वपूर्ण जिम्मेवारी पाउने सम्भावना छ, उनले भने, सभामुख चयनको लागि अझै केही दिन बाँकी रहेको छ, मनोनयन दर्ता पछि भनौँला ।’

सभामुखमा नेकपा एमालेले कसलाई उम्मेदवार बनाउने भन्ने बारेमा कुनै निर्णय लिइसकेको छैन । नेकपा एमालेभित्र छविलाल विश्वकर्मा, पृथ्वी सुब्बा गुरुङ लगायत चार जनाको विषयमा छलफल भईरहेको नेकपा एमालेका सचिव योगेश भट्टराईले जानकारी दिए ।