विराटनगरमा जारी ‘सीएनआई कोसी एक्स्पो’ आज समापन हुँदै, साँझ ‘द एज ब्याण्ड’ ले प्रस्तुति दिने

विराटनगर । नेपाल उद्योग परिसंघ (सीएनआई) प्रदेश १ को आयोजनामा माघ १९ गतेबाट सुरु भएको ‘सीएनआई कोसी एक्स्पो २०७९’ को आज समापन  हुँदैछ । १० दिने एक्स्पो ऐतिहासिक रूपमा सम्पन्न हुन लागेको हो ।

विराटनगर-२ स्थित शंकरपुर मार्गमा आयोजना गरिएको अन्तर्राष्ट्रिय स्तरको एक्स्पो भव्य रूपमा सफल हुन लागेको आयोजकको भनाई छ ।  एक्स्पोको समापन समारोह पनि उद्घाटन जस्तै अविस्मरणीय बनाइने दाबी छ । एक्स्पोमा ३७० वटा स्टलहरू रहेका थिए ।

स्वदेशी तथा विदेशी उत्पादन र वस्तुहरूको अवलोकन तथा खरिद विक्रीमा पनि सीएनआईले राम्रो अवसर प्राप्त गरेको जनाइएको छ । मुलुक आर्थिक रूपमा विषम अवस्थामा रहेको बेलामा आर्थिक गतिविधिलाई चलायमान बनाउन र उद्योग व्यवसायलाई बचाइराख्नका लागि सीएनआई कोसी एक्स्पोको भूमिका महत्त्वपूर्ण ठहरिएको सिएनआई प्रदेश १ का अध्यक्ष भीम घिमिरेले बताए ।

उनले मुख्य प्रायोजकदेखि प्रायोजक, प्रवर्द्धनमा भूमिका निर्वाह गर्ने विराटनगर महानगरपालिकासहित सुनसरीको दुहबी नगरपालिका, मोरङको बुढीगंगा र कटहरी गाउँपालिकाले स्थानीय स्तरमा रहेका उद्यमीहरूलाई उत्पादन प्रवर्द्धनमा अतुलनीय सहयोग पु-याएको दाबी गरे ।

एक्सोलाई ऐतिहासिक बनाउने लक्ष्य अनुसार प्रदेश १ कै सर्वोच्च शिखर सगरमाथाबाट आर्थिक समृद्धिको सुरुवात गर्ने अभियान समेत सफल भएको उनले बताए ।

एक्स्पोमा नेपाल बाहेक भारत, बंगलादेश, पाकिस्तान लगायत अन्य मुलुकहरूबाट उद्योगी व्यवसायीहरूले आफ्नो मुलुकको उत्पादनलाई नेपाली उपभोक्तामाझ परिचित गराएका छन् । एक्स्पो अवधिभर हरेक साँझ नयाँ-नयाँ कलाकारहरूले प्रस्तुत गर्ने सांगीतिक र सांस्कृतिक प्रस्तुतिले समेत एक्स्पोको अपरिहार्यता पुष्टि गरेको जनाइएको छ ।

तीन तहको सरकार मध्ये एक्स्पोलाई सफल बनाउन सहयोग गरेको प्रदेश १ सरकार, विभिन्न मन्त्रालय र निकायहरूको भूमिका पनि सीएनआई प्रदेश १ का लागि निकै महत्त्वपूर्ण बनेको अध्यक्ष घिमिरेले बताए । एक्स्पोको समापन शनिबार अपराह्न ३ बजे प्रदेश १ का मुख्यमन्त्री हिक्मतकुमार कार्कीले गर्ने आयोजकले जनाएको छ ।

त्यसैगरी अतिथिहरुमा संघीय सरकारका सामान्य प्रशासनमन्त्री अमनलाल मोदी, महिला बालबालिका तथा ज्येष्ठ नागरिकमन्त्री भगवती चौधरी लगायतका विशिष्ट व्यक्तित्वहरू सहभागी हुने अध्यक्ष घिमिरेले बताए ।

समापनका लागि सीएनआई प्रदेश समितिले महत्त्वपूर्ण तयारीहरू गरेको छ । एक्स्पोमा उत्कृष्ट रहेका स्टलहरूलाई मूल्यांकन समितिको सिफारिसमा समापन समापन समारोहमा सम्मान गरिने जनाइएको छ ।

सीएनआईले एक्स्पो अवधिभर ज्येष्ठ नागरिकहरूलाई टिकट निःशुल्क गरेको थियो । समापनमा पनि त्यसलाई निरन्तरता दिइएको जनाइएको छ । अन्य उमेर समूहको हकका भने यसअघि नै परिमार्जन गरेर तोकिएको प्रवेश शुल्क लाग्ने छ । जस अनुसार साँझ ६ः३० बजेसम्म १०० रुपैयाँमा टिकट खरिद गर्न सकिने छ । त्यसपछिको समय २०० रुपैयाँ लाग्ने जनाइएको छ ।

समापन समारोह सम्पन्न भएपछि साँस्कृतिक तथा मनोरञ्जनात्मक कार्यक्रमहरु राखिएको छ । शनिबार साँझ चर्चित ब्याण्ड ‘द एज ब्याण्ड’ को प्रस्तुति रहेको छ ।