नापोलीलाई १६ अंकको अग्रता, युभेन्ट्स पनि विजयी

काठमाडौं । इटालियन सिरी ए फुटबलमा शीर्ष स्थानको नापोलीले सहज जित निकालेको छ ।आइतबार राति भएको खेलमा नापोलीले क्रेमोनेसेलाई ३-० गोल अन्तरले हराएको हो ।

नापोलीको जितमा कभिचा केभाराटकेलिया, भिक्टर ओसिमहेन र इलिफ इल्मासले एक एक गोल गरे। जितसँगै नापोलीले २२ खेलमा ५९ अंक जोडेको छ । नापोली दोस्रो स्थानको इन्टर भन्दा १६ अंकले अघि रहेको छ । क्रेमोनेसे ८ अंक जोडेर पुछारमा रहेको छ ।

सिरी ‘ए’ कै अर्काे खेलमा युभेन्ट्सले फियोरेन्टिनामाथि १–० को जित दर्ता गरेको छ । युभेन्ट्सको जितमा पहिलो हाफमा एड्रिएन राविओटले गरेको गोल नै निर्णायक बन्यो ।

यस जितसँगै युभेन्ट्स २२ खेलबाट २९ अंक जोडेर नवौं स्थानमा उक्लिएको छ । नियम उल्लंघन गरेका कारण युभेन्ट्सको १५ अंक घटाइएको थियो । १५ अंक नघटाइएको भए युभेन्ट्स अहिले दोस्रो स्थानमा उक्लने थियो । पराजित फियोरेन्टिना २२ खेलबाट २४ अंक जोडेर १४औं स्थानमा छ ।