मधेसले मनायो जनयुद्ध दिवस, उपराष्ट्रपति पुनले भने– गणतन्त्रका लागि बगेको रगतको सम्मान भयो

जनकपुरधाम । मधेस प्रदेश सरकारले आज ‘जनयुद्ध दिवस’ मनाएको छ । मधेस भवनमा आयोजित ‘जनयुद्ध दिवस’मा उपराष्ट्रपति नन्दबहादुर पुन सहभागी भएका थिए । मधेसको गृह तथा सञ्चार मन्त्रालय अन्तर्गतको शहीद प्रतिष्ठानले आयोजना गरेको कार्यक्रममा उपराष्ट्रपति पुनःले सार्वजनिक विदाले गणतन्त्र प्राप्तिका लागि बगेको रगत र पसिनाको सम्मान भएको दाबी गरेका छन् ।

उनले भने, ‘यसअघि नै केही प्रदेश सरकारले गत वर्ष पनि जनयुद्ध दिवसमा बिदा दिएको थियो । यो पटक संघीय सरकारले पनि बिदा दिएपछि गणतन्त्र प्राप्तिका लागि बगेको रगत र पसिनाको सम्मान भएको छ ।’

जनयुद्ध दिवसको अवसरमा बिदा दिएकोमा विरोध समेत भइरहेको विषयमा उनले सार्वजनिक विदाको पूर्वाग्रह राख्नेहरू विरोध गरिरहेको तर्क गरे । उनले शान्ति प्रक्रियाका बाँकी काम वर्तमान सरकारले पूरा गर्नुपर्ने पनि बताए ।

उक्त समारोहमा मुख्यमन्त्री सरोजकुमार यादवले मधेसी जनता रहेसम्म प्राप्त संघीयतासहितका उपलब्धी कसैले हटाउन नसक्ने दाबी गरे । संघीयता कसैले भिखमा नदिएको भन्दै उनले संघीयता हटाउने सपना नदेख्न चेतावनी समेत दिए । उनले संघीयतालाई संस्थागत गर्न प्रदेश प्रहरी र निजामती कर्मचारी ऐनलाई कार्यान्वयनमा ल्याउन वर्तमान सरकारसँग आग्रह समेत गरे ।

मधेस प्रदेश सरकारले गत वर्ष पनि जनयुद्ध दिवसमा सार्वजनिक बिदा दिएको थियो ।