वेस्टह्यामलाई हराउँदै म्यानचेस्टर युनाइटेड क्वाटरफाइनलमा

काठमाडौँ । म्यानचेस्टर युनाइटेड एफए कपको क्वाटरफाइनलमा पुगेको छ । गएराती सम्पन्न खेलमा म्यानचेस्टर युनाइटेडले वेस्टह्याम युनाइटेडलाई ३-१ गोल अन्तरले पराजित गर्दै एफए कपको क्वाटरफाइनलमा आफ्नो स्थान सुरक्षित गरेको हो ।

म्यानचेस्टर युनाइटेडको जितमा अलेजान्द्रो गर्नाचो र फ्रेडले एक एक गोल गरेका थिए भने एक गोल वेस्टह्यामका नायफ अग्युरोले आत्मघाती गोल गरेका थिए । वेस्टह्यामका लागि एक गोल सेड बेनराह्माले गरेका थिए । पहिलो हाफ बिना कुनै गोल सकिएको यस खेलमा १-० ले पछि परेपछि म्यानचेस्टर युनाइटेडले कम्ब्याक गर्दै खेल जितेको थियो ।

गएराती नै सम्पन्न खेलमा बर्नलीले फ्लीटवूड टाउनलाई १-० गोल अन्तरले पराजित गर्दै एफए कपको क्वाटरफाइनलमा पुगेको छ भने शेफिल्ड युनाइटेडले टोटनह्यामलाई १-० गोल अन्तरले पराजित गर्दै क्वाटरफाइनलमा स्थान सुरक्षित गरेको छ । ग्रिम्सबाई टाउनले साउथहम्पटनलाई २-१ गोल अन्तरले पराजित गर्दै क्वाटरफाइनलमा पुगेको छ ।

अब एफए कपको क्वाटरफाइनलमा शेफिल्ड युनाइटेडले ब्ल्याकबर्न रोभर्ससँग, म्यानचेस्टर सिटीले बर्नलीसँग, ब्राइटनले ग्रिम्सबाई टाउनसँग र म्यानचेस्टर युनाइटेडले फुलह्यामसँग खेल्ने छन् ।