बागमती सरकारमा सामेल एमालेका ४ मन्त्रीले दिए सामूहिक राजीनामा

काठमाडौँ । नेकपा एमाले बागमती प्रदेश सरकारबाट बाहिरिएको छ ।

एमालेबाट मन्त्री बनेका ४ जनाले मुख्यमन्त्री शालिकराम जम्कट्टेललाई सामूहिक राजीनामा बुझाएका छन् ।

अर्थमन्त्री जगन्नाथ थपलिया, श्रम रोजगार तथा यातायात मन्त्री एकालाल श्रेष्ठ, स्वास्थ्य मन्त्री रामेश्वर श्रेष्ठ र कृषि तथा पशुपन्छी विकासमन्त्री केशवप्रसाद पोखरेलले राजीनामा दिएका हुन् । थपलिया २६ पुसमा अर्थमन्त्री नियुक्त भएका थिए । अन्य ३ मन्त्री ११ माघमा नियुक्त भएका थिए ।

बागमती सरकारलाई दिएकाे समर्थनसमेत फिर्ता लिएर एमाले बाहिरिएपछि मुख्यमन्त्री जम्कट्टेलले संसदमा विश्वासकाे मत प्रमाणित गर्नु पर्ने छ ।

मुख्यमन्त्री जम्कट्टेललाई विश्वासकाे मत दिने तयारीमा नेपाली कांग्रेससहितका ४ राजनीतिक दल रहेका छन् । संघीय सरकारकाे सत्ता गठबन्धनमा रहेका नेपाली कांग्रेससहित, नेकपा एकीकृत समाजवादीले जम्कट्टेललाई विश्वासकाे मत दिने भएका हुन् । त्यस्तै, हाम्रो नेपाली पार्टीले मुख्यमन्त्रीलाई विश्वासको मत दिने बताइएको छ ।

तर, संघीय सरकारकाे सत्ता गठबन्धनमा नरहेकाे एमाले, राष्ट्रिय प्रजातन्त्र पार्टी र नेपाल मजदुर किसान पार्टीले भने मुख्यमन्त्री जम्केट्टेललाई विश्वासकाे मत नदिने भएका छन् ।  उनीहरूले विपक्षमा मत दिने निर्णय गरिसकेका छन् ।

हाल बागमती प्रदेशमा माओवादीमा २१, कांग्रेसको ३७, एकीकृत समाजवादीको ७ र हाम्रो नेपाली पार्टीको २ सिट छ भने जम्मा प्रदेश सभामा ११० संसद छन् ।

विश्वासको मत दिने कार्यक्रम केही बेरमा सुरु हुने प्रदेश सभा सचिवालयले जनाएको छ ।