खानेपानी मन्त्री खानले दिए राजीनामा, जनमत पार्टी सरकारबाट बाहिरिने संकेत

काठमाडौँ । खानेपानी मन्त्री अब्दुल खानले राजीनामा दिएका छन् । आफूले पाएको मन्त्रालयप्रति असन्तुष्टि जनाइरहेका जनमत पार्टीका खानले प्रधानमन्त्री पुष्पकमल दाहालसमक्ष राजीनामा दिएका हुन् ।

जनमत पार्टीले पहिलेदेखि नै उद्योग मन्त्रालय माग गर्दै आएको थियो । तर, जनमतलाई खानेपानी मन्त्रालय दिइएको छ । अहिले विस्तार हुन लागेको मन्त्रिपरिषद्मा आफ्नो मन्त्रालय फेरि खानले उद्योग मन्त्रालय माग गरेका थिए । तर, उक्त मन्त्रालय नपाएपछि असन्तुष्टि जनाउँदै उनले राजीनामा दिएका हुन् ।

खान ११ पुसमा नेकपा एमालेको नेतृत्वमा बनेको ७ दलीय गठबन्धनको सरकारमा मन्त्री बनेका थिए ।

पार्टीकै निर्देशन अनुसार आफूले राजीनामा दिएको खानले बताएका छन् । खानको राजीनामासँग जनमत पार्टी समर्थनसमेत फिर्ता लिएर सरकारबाट बाहिरिने संकेत गरेकाे छ । यसका लागि अहिले पार्टीको बैठक बसिरहेको छ ।