रौतहटकाे गरूडामा प्रदर्शनकारी र प्रहरीबीच झडप, गोली चल्दा एक घाइते

गौर । रौतहटको गरुडा बजारमा प्रदर्शनकारी र प्रहरीबीच बुधबार झडप भएको छ । झडपका क्रममा गोली लागेर एक जना घाइते भएका छन् ।

घाइते हुनेमा गरुडा नगरपालिका ५ लक्ष्मीपुरका २२ वर्षका गजेन्द्र यादव छन् । उनको हातमा गोली लागेको छ । झडपलाई नियन्त्रणमा लिन प्रहरीले १६ राउन्ड अश्रृग्यास र गोली प्रहार गरेको थियो ।

गरुडाका मेयरका उम्मेदवार रहेका दीपक यादव नेतृत्वको समूहले नगरपालिकाको कार्यालयमा ताला लगाउन खोजेपछि झडप भएको थियो । नगरपालिकाले गरेको कामको सूचनाको माग गर्दै उक्त समूहले नगरपालिकामा विरोध प्रदर्शन र अनसन जस्ता कार्यक्रम गर्दै आएको थियो ।

प्रदर्शनकारीले गरेको ढुंगामुढाबाट नगरपालिका कार्यालयको गाडी र झ्यालको सीसा फेटेको छ ।

प्रहरीले झपडमा उत्रिएका यादवसहित ४ जनालाई नियन्त्रणमा लिएको छ ।