फोहर नउठाउने महानगर र धम्क्याउने संघीय सरकार दुवै सच्चिनुपर्छ : नेता कोइराला

काठमाडौँ । नेपाली कांग्रेसका नेता डा. शेखर कोइरालाले काठमाडौँ महानगरपालिकाले सिंहदरबारलगायत संघीय सरकारका कार्यालय क्षेत्रको फोहर नउठाउनु अराजकता भएको बताएका छन् । नेता कोइरालाले बिहीबार सामाजिक सञ्जाल फेसबुकमार्फत यस्तो बताएका हुन् ।

उनले जिम्मेवार तहको यो व्यवहारको सबैले विरोध गर्नुपर्ने बताएका छन् ।

‘कामपाले सिंहदरवार लगायत स्थानको फोहोर नउठाउनु अराजकता हो,’ उनले भनेका छन्, ‘जिम्मेवार तहको यो व्यवहारको सबैले विरोध गर्नैपर्छ ।’

उनले महानगरप्रति संघीय सरकारले पनि धम्कीको भाषा प्रयोग गरेको र उक्त कार्य सिंहदरकाले स्थानीय निकायलाई कसरी हेर्छ भन्ने कुराको प्रतिपिम्ब भएको बताएका छन् ।

‘अर्कोतर्फ सरकारले पनि महानगरले उठाएका प्रश्नको वेवास्ता गर्दै धम्कीको भाषा प्रयोग गर्नु सिंहदरवारले स्थानीय निकायलाई हेर्ने दृष्टिकोणको प्रतिविम्ब हो,’ उनले भनेका छन्, ‘दुवै सच्चिनु पर्छ ।’