तनहुँ जिल्लाका जनता बेबकुफ छैनन्, पढेका डाक्टरलाई जिताउँदैनन् : किसान श्रेष्ठ

काठमाडौँ । नेकपा एकीकृत समाजवादीका नेता किसान श्रेष्ठले तनहुँ जिल्लाका जनता बेककुफ नभएको बताएका छन् । उनले सत्ता साझेदार दलका साझा उम्मेदवार बनेका गोविन्द भट्टराईको पक्षमा मत माग्दै नेपाली कांग्रेसले आयोजना गरेको विशाल कोणसभामा यस्तो बताएका हुन् । उनले राष्ट्रिय स्वतन्त्र पार्टीबाट उम्मेदवार बनेका डा. स्वर्णिम वाग्लेप्रति कटाक्ष गर्दै यस्तो बताएका हुन् ।

‘तनहुँका जनतालाई बेबकुफ बनाउन पाइन्छ कि भनेर आउन पाइन्छ ? खबरदार,’ उनले भने, ‘तिमी पढेको डाक्टर होस् कि जेसुकै होस् मलाई थाहा छैन ।’

उनले यस पटक रुख चिन्हमा भोट हाल्न आग्रह गरे ।

‘यस पटक किसान श्रेष्ठलाई भोट हाल्नुस्, गठबन्धनलाई भोट हाल्नुस्,’ उनले भने, ‘किसान श्रेष्ठको चुनाव चिन्ह रुख हो । किसान श्रेष्ठलाई रुख चिन्हमा भोट हालेर गोविन्द भट्टराईलाई विजयी बनाउन आग्रह गर्दछु ।’