भारतले सिमाना मिचिरिहेको छ, एमसीसी प्रोजेक्ट नेपालविरुद्ध काम गर्दैछ : प्रकाण्ड

काठमाडाैँ । नेपाल कम्युनिस्ट पार्टीका प्रवक्ता खड्गबहादुर विश्वकर्माले देशको अस्तित्व संकटमा पर्न लागेको बताएका छन् ।

बिहीबार नेपाल कम्युनिस्ट पार्टीले आयोजना गरेको पत्रकार सम्मेलनमा बोल्दै प्रवक्ता विश्वकर्माले देश असाध्यै संकटपूर्ण अवस्थामा रहेको बताए । उनले देशमा अहिलेको जस्तो संकट विगतमा कहिल्यै नआएको बताए ।

एमसीसी प्रोजेक्ट देशविरुद्ध केन्द्रित रहेको र भारतीयले सीमाना मिचिरहेको भन्दै देशको स्वाधिनतामाथि नै प्रश्न उठेको बताए । उनले विश्वका शक्ति राष्ट्रको संघर्ष दुश्मनीपूर्ण अवस्थामा पुगेको उल्लेख गरे । प्रवक्ता विश्वकर्माले अमेरिका र चीनबिचको अन्तरबिरोधलाई नेपालले ठिक ढंगले विश्लेषण गर्न नसके नेपाल युक्रेनको अवस्थामा पुग्ने समेत चेतावनी दिए ।

‘देश असाध्यै संकटपूर्ण घडीमा छ,’ उनले भने, ‘यतिधेरै संकट देशको जीवनमा कहिल्यै पनि आएको थिएन । पञ्चायती व्यवस्थामा पनि यत्ति संकट आएको थिएन । त्यसका आफ्नै प्रकृतिका संकट थिए । ०४६ देखि ०६३ सम्म आउँदा पनि यति संकट आएको थिएन ।’

तर त्यतिबेला पनि संसदीय प्रतिक्रियावादी व्यवस्था भने कायमै रहेको उनले बताए ।

‘एमसीसी जस्ता डरलाग्दा अमेरिकी प्रोजेक्ट पनि हाम्राविरुद्ध केन्द्रित छन्,’ उनले भने, ‘सिमाना मिच्ने भारतीय साम्राज्यवादीहरुको एकपछि अर्को हर्कत बढी नै राखेको छ । देशको स्वाधिनता के हुने ? हाम्रो देशको अस्तित्व रहन्छ कि रहँदैन भन्ने छ ।’

उनले अहिले विश्वमा पावर र सुपर पावरहरु बीचको संघर्ष, अन्र्तविरोध दुश्मनीपूर्ण ठाउँमा पुगेको बताए ।

‘त्यो भनेको निल्ने र निलाइपाउने प्रक्रिया अगाडी बढ्छ,’ उनले भने, ‘अमेरिका र चीन बीचको अन्तबिरोध जुन ठाउँमा जान खोजेको छ, नेपालका शासक वर्गले ठिक ढंगले त्यसको विश्लेषण गर्न सकेनन् भने र ठिक ढंगले डिल गर्न सकेनन् भने नेपाल अर्को युक्रेन हुँदैन भन्न सकिने स्थिति छैन ।’

प्रवक्ता विश्वकर्माले अहिलेको राजनीतिमा विचार, नीति, सिद्धान्त र नैतिकताको कुनै ख्याल नराखिएको बताए । राजनीति केवल सत्ता र कुर्सिको निम्ति गरिने षड्यन्त्रमुलक खेलको रुपमा स्थापित हुन पुगेको उनको अनुभव छ ।

उनले सत्ता र कुर्सिको स्वार्थको निम्ति विदेशी शक्तिसँग सौदाबाजी भइरहेको उनले आरोप लगाए ।

‘राजनीति भनेको सत्ता र कुर्सिको निम्ति फोहोरीभन्दा फोहोरी, षड्यन्त्रमुलक खेल गर्ने हो भन्ने स्थापित छ,’ उनले भने, ‘कुनै विचारको प्रश्न मुख्य छैन । राजनीतिको प्रश्न मुख्य छैन । सिद्धान्तको प्रश्न मुख्य छैन । नीति, नैतिकता, संस्कारको प्रश्न मुख्य छैन । जसरी पनि कुर्सि, जसरी पनि सत्ता भन्ने दलाल पुँजिवादको चरित्र जो छ यसले आफ्नो सत्ता स्वार्थ र कुर्सी स्वार्थको निम्ति विदेशी शक्तिहरुसँग ठूलठूला सौदाबाजी देश र जनताका बिरुद्धमा गर्ने र देशभित्र एकपछि अर्को जनताका बिरुद्ध अपराध गर्ने र अस्थिरताको खेल गर्ने डरलाग्दो स्थिति छ ।’

पत्रकार सम्मेलनमा बोल्दै उनले नेपाल कम्युनिस्ट पार्टीको स्थापना दिवसको अवसरमा वैशाख ९ गते आफ्नो पार्टीले काठमाडौँको खुलामञ्चमा कार्यक्रम गर्ने बताए । कार्यक्रममा देशका कम्युनिष्ट तथा वामपन्थी १० वटा राजनीतिक पार्टीका शीर्ष नेताले सम्बोधन गर्ने बताए । करिव १५ हजार मानिसहरुको सहभागिता हुने सो कार्यक्रममा शिर्ष पार्टीका नेताहरुलाई समेत निमन्त्रण गरिएको उनले बताए ।