विद्युत् कटौतीको विरुद्धमा विराटनगरका उद्योगी, दुहबी ग्रिड घेराउ

विराटनगर । अनियमित विद्युत् कटौतीले उद्योग चौपट भएको भन्दै मोरङ व्यापार सङ्घले  विद्युत् प्राधिकरणको दुहबी ग्रिडमा घेराउ गरेको छ । विद्युत् कटौतीको तालिका सार्वजनिक गर्न र भएको विद्युत् व्यवस्थित रूपमा वितरण गर्नुपर्ने माग गर्दै सङ्घमा आबद्ध सुनसरी मोरङ औद्योगिक क्षेत्रका उद्योगीले ग्रिडमा धर्ना दिएका हुन्।

धर्नाका क्रममा उद्योगीले विद्युत् कटौती तालिका सार्वजनिक गर्नुपर्ने, जथाभाबी विद्युत् काट्न नहुने, उद्योग मार्न पाइँदैन, कुलमान घिसिङ राजीनामा दे जस्ता नारा लगाएका थिए ।

उनीहरूले विद्युत् कटौतीको तालिका सार्वजनिक नगरेसम्म घेराउ कार्यक्रम जारी रहने बताएका छन् । दैनिक ८ देखि १२ घण्टासम्म सूचनाबिना हुँदै आएको अनियमित विद्युत् आपूर्तिका कारण उद्योगको उत्पादन प्रक्रिया प्राय ठप्प रहेको र औद्योगिक कच्चा पदार्थ खेर जाने तथा मेसिनरत सामान बिग्रिने गरेको सङ्घका अध्यक्ष नवीन रिजालले बताए ।

उद्योग वाणिज्य महासङ्घका केन्द्रीय सदस्य समेत रहेको रिजनलका अनुसार लामो समयदेखि बजारमा रहेको मन्दी, बैङ्कको चर्को ब्याजदरको पीडा झेल्दै आएको औद्योगिक क्षेत्रले पछिल्लो पटक अनियमित विद्युत् आपूर्तिकै कारण उत्पादन लागत समेत बढेको छ ।

उत्पादित वस्तुको गुणस्तर र प्रतिस्पर्धात्मक क्षमतामै ह्रास आएको, श्रमिक व्यवस्थापनमा समस्या भएपछि कार्यालय घेराउ गर्न बाध्य भएको उनले बताए ।

विद्युत् प्राधिकरणले सूचना नदिई दैनिक लामो समय आपूर्ति बन्द गर्दा सुनसरी मोरङ औद्योगिक क्षेत्र प्रभावित भई ६० प्रतिशतसम्म उत्पादन कटौती भएको सङ्घका पूर्व अध्यक्ष पवन सारडाले बताए।

उद्योगमा बिजुली अवराेधकाे समस्या १५ दिनभित्रै समाधान हुन्छ : प्राधिकरण