वर्षाका कारण आज नेपाल–यूएईको खेल स्थगित भए भोलि ९ विकेटबाटै सुरू हुने

काठमाडौँ । एसिसी प्रिमियर कप क्रिकेट प्रतियोगिताको उपाधीका लागि घरेलु टोली नेपाल र यूएई बीचको रोकिएको खेल आजै सुरु हुने सम्भावना न्यून हुँदै गएको छ । वर्षाका कारण रोकिएको खेल अझै सुचारु हुन सकेको छैन । दिउँसो ३ बजेसम्म पानी रोकिएर कम्तीमा २० ओभरसम्मको खेल हुन सक्ने अवस्था रहे मात्रै आज खेल हुने नेपाल क्रिकेट संघ क्यानका पदाधिकारीहरुले जनाएका छन् ।

वर्षा नरोकिए वा २० ओभरसम्म पनि सक्ने समय नरहे आज खेल स्थगित गर्नुपर्ने हुन्छ । अर्कोतर्फ वर्षाका कारण खेल मैदान समेत हिलो भएकोले आज खेल हुने सम्भावना न्यून हुँदै गएको छ । आज खेल नभएको अवस्थामा भोलि युएईको ९ विकेट क्षति भएकै अवस्थाबाट खेल सुचारु हुने छ ।

आजको खेलमा नेपालले टस जितेर पहिले फिल्डिङ रोजेको थियो । पहिले ब्याटिङको निम्तो पाएको युएईले वर्षाका कारण खेल रोकिनुअघि २७.३ ओभरमा ९ विकेट गुमाएर १०६ रन बनाएको छ ।