पोखराबाट म्याद गुज्रिएका १४ लाखको बियर बरामद

पोखरा । पोखराबाट १४ लाख भन्दा बढी मूल्यको बियर बरामद भएको छ । पिकनिकमा लगिएको सामान म्याद गुज्रिएको भेटिएको सूचना पाएपछि जिल्ला प्रशासन कार्यालयको टोलीले छापा मारेको थियो ।

सेलवेज डिपार्टमेन्ट स्टोरबाट बियर खरिद गरेको र सेलवेजले पनि खरिद गरेको स्टोरबाट १४ लाखको बियर बरामद भएको हो । पस्र्याङ धारापानी स्थित लाभाजु इन्टरप्राइज पुगेर हेर्दा ठूलो मात्रामा म्याद गुज्रेको भेटिएको सहायक प्रमुख जिल्ला अधिकारी तथा सूचना अधिकारी गुरुदत्त ढकालले जानकारी दिए ।

लाभाजु इन्टरप्राइजको स्टोरबाट १३ लाख ९८ हजार ५ सय ३० रुपैयाँ बराबरको बर्डवाइजरको बियर जिल्ला प्रशासन कार्यालय कास्कीले नियन्त्रणमा लिएको उनले बताए ।

६ सय ५० एमएलको ३ सय १६ कार्टुन र ११ वटा बोतल प्रशासनले बरामद गरेको हो भने, ३ सय ३० एमएलको ६ कार्टुन र ११ वटा बोतल नियन्त्रणमा लिएको हो । उनका अनुसार सरोकारवालहरूको उपस्थितिमा नष्ट गरिनेछ ।

उपभोक्ता संरक्षण ऐन २०७५ अनुसार ५ हजारदेखि १ लाखसम्म जरिवाना हुने उल्लेख छ ।