लिपिबद्ध गरेर मात्रै सुशासन कायम हुन सक्दैन: मन्त्री पाण्डे

नवलपरासी । लुम्बिनी प्रदेश सरकारका प्रवक्ता मन्त्री सन्तोष पाण्डेले­­ सुशासन कायम गर्नका लागी लिपिबद्ध मात्रै गरेर नभई जिम्मेवार तहबाट नै पहल गर्नुपर्ने बताएका छन् । नवलपरासी (बर्दघाट पश्चिम सुस्ता)मा भएको लुम्बिनी प्रदेश आन्तरिक, कानुन तथा सहकारी मन्त्रालयको सहयोग र रिपोर्टर्स क्लब नेपाल लुम्बिनी प्रदेश कार्यालय बुटवलको आयोजनामा सुशासनका लागी साक्षरता कार्यक्रममा बोल्दै मन्त्री पाण्डेले सुशासन कायम गर्नको लागि अरूलाई दोष दिनु भन्दा पनि नेतृत्व तहबाट नै पहल गर्नुपर्ने आवश्यक रहेको बताए ।

उनले भने सुशासन आफैबाट सुरुवात गर्नुपर्ने हुन्छ त्यसमा नेतृत्व, कर्मचारी, तथा सेवाग्राही सबै जिम्मेवार बन्नुपर्छ अनि मात्रै लागु हुन्छ अन्यथा भाषणमा मात्रै सीमित हुन्छ । संघीयताको प्रत्याभूति नागरिकलाई दिलाउन प्रदेश सरकार लागि रहेको जिकिर गर्दै त्यसका लागि संघसँग विकेन्द्रीकरणको लागि संर्घष गरिरहेको बताए । उनले संघीयता कार्यान्वयनका लागी सबैको सहयोग आवश्यक रहेको बताए ।

मन्त्री पाण्डेले प्रदेश सरकार विस्तारको लागि मन्त्रालय बाँडफाँडमा सत्तारुढ दलहरू लागि रहेको बताउँदै अब छिटै सरकारले पूर्णता पाउने बताए । उनले लुम्बिनी प्रदेश सरकारले पर्यटन क्षेत्रको विकास गर्न बुद्धको जन्मस्थल लुम्बिनी क्षेत्रको प्रवर्द्धन गर्नु पर्नेमा जोड दिए । त्यसको लागि तीनै तहका सरकारको दायित्व रहेको औल्याउँदै प्रदेश सरकार घरेलु उद्योग निर्माण,खेतीयोग्य भूमिमा चाहिने जति मल भण्डारण गर्ने जस्ता कार्यमा लागिरहेको बताए ।

कार्यक्रममा जिल्ला समन्वय समितिका प्रमुख भौमति यादवले सुशासन कायम गर्नको लागि जिल्ला समन्वयलाई पूर्ण जिम्मेवार बनाउनु पर्ने बताए । उनले स्थानीय तहको विकासको लागि सयममै नदीजन्य पदार्थको ठेक्का लगाउनु पर्नेमा जोड दिए । उनले ढिला सुस्तीका कारण नदी जन्य पदार्थ चोरी बढेकाले त्यसलाई रोक्न सबैले ध्यान दिनु पर्ने बताए ।

नवलपरासी (बर्दघाट पश्चिम सुस्ता) का प्रमुख जिल्ला अधिकारी विश्वप्रकाश अर्यालले सुशासन कायम राख्नको लागि पारदर्शिता,जबाफदेहिता र विधिको शासन पालना गर्नुपर्नेमा जोड दिए । उनले विकासे आयोजनाहरू समयमा पुरा नहुनुमा आयोजना छनोटमा नै कमजोरी रहेको बताए । उनले सेवाग्राही प्रविधिमैत्री हुन नसक्दा काममा ढिला सुस्ती भएको भन्दै सुधारको लागि विभिन्न सचेतनामूलक कार्यक्रमहरू गर्नुपर्नेमा जोड दिए । उनले स्थानीयवासी सचेत नहुँदा सीमा क्षेत्रमा तस्करहरूले लाभ लिएको बताए । उनले जिल्लामा सुशासनको अवस्था तुलनात्मक रूपमा केही सुधार भए पनि जनचाहना अनुरूप हुन नसकेकाले सुधारका लागी आफूहरूले पहल गरिरहेको जानकारी दिए ।

त्यसै गरी पूर्व राष्ट्रिय सभा सदस्य रामलखन हरिजनले शिक्षा क्षेत्रमा बेथिति रहेकाले सुधार गर्नुपर्नेमा जोड दिए । त्यस्तै बर्दघाट नगरपालिकाका प्रमुख शम्भु लाल श्रेष्ठले सेवाग्राहीलाई छिटो छरितो सेवा दिन आफूहरू लागिरहेको बताउँदै जनगुनासोलाई ख्यालमा राखेर काम गरिहेरेको बताए । त्यसै गरी सुनवल नगरपालिकाका प्रमुख विमला अर्यालले आफूहरू जनताको न्याय र सुशासनको पक्षमा रहेको बताउँदै आफूहरूले जनताको मर्म र आवश्यकता अनुसार पालिकाले काम गरिरहेको बताए ।

रामग्राम नगरपालिकाका प्रमुख धनपति यादवले जनतालाई सेवा दिने कुरामा ढिलासुस्ती नगरेको जिकिर गर्दै पत्रकारले सत्यतथ्य नबुझी समाचार सम्प्रेषण गर्दा जनतामा भ्रम सिर्जना भएको बताए । उनले काम गर्ने क्रममा कमी कमजोरी हुन सक्छन् त्यसलाई सुधार गरेर अघि बढ्न पालिका तयार रहेको बताए ।

कार्यक्रममा प्रतापपुर गाउँपालिकाका अध्यक्ष उमेश चन्द्र यादव, सरावल गाउँपालिकाका अध्यक्ष सुखाडी प्रसाद चौधरी, पाल्हिनन्दन गाउँपालिकाका अध्यक्ष बैजु प्रसाद गुप्ता, बर्दघाट नगरपालिकाका प्रमुख प्रशासकीय अधिकृत कृष्ण प्रसाद सापकोटा,सुनवल नगरपालिकाका प्रमुख प्रशासकीय अधिकृत भक्तिराम मरासिनी,कोष लेखा नियन्त्रण कार्यालयका प्रमुख परमुराम धिताल , पालिका स्वास्थ्य प्रमुख प्रकाश पराजुली,सुनौलो सामुदायिक विकास केन्द्रका अध्यक्ष सपना अधिकारी थापा, महाकवि देवकोटा क्याम्पस प्रमुख नारायण प्रसाद ढकालले, स्थानीयवासी सञ्जय कुमार चौहान लगायत जिल्लामा क्रियाशील विभिन्न सरकारी, गैरसरकारी कार्यालयका प्रमुख प्रतिनिधि,क्रियाशील पत्रकार,सुरक्षाकर्मीले भनाई राखेका थिए ।

कार्यक्रम रिपोर्टर्स क्लब नेपाल लुम्बिनी प्रदेशका अध्यक्ष राम कुमार क्षेत्रीको अध्यक्षता र तेजेन्द्र केसीको सञ्चालनमा सम्पन्न भएको थियो ।