लेकसाइडमा मोटरसाइकल ठोक्किँदा कपनका १८ वर्षीय युवकको मृत्यु

पोखरा । पोखराको लेकसाइडमा मोटरसाइकल दुर्घटना हुँदा एकजनाको मृत्यु भएको छ । राती सवा १ बजे लेकसाइड स्थित हल्लनचोकबाट गैह्राको चौतारातर्फ गइरहेको ग २४ प ३१० नम्बरको मोटरसाइकल आफैँ अनियन्त्रित भएको हो ।

मोटरसाइकल बिजुलीको पोलमा ठोक्किँदा मोटरसाइकल पछाडि सवार काठमाडौँ कपनका १८ वर्षीय सफल खतिवडाको मृत्यु भएको हो । मोटरसाइकल चालक तनहुँको म्याग्दे ४ का १७ वर्षीय संगम बानियाँ गम्भीर घाइते छन् ।

उनको टाउको र घाँटीमा चोट देखिएको छ । दुर्घटनामा घाइते दुवैलाई उपचारका लागि मेट्रोसिटी अस्पताल पठाइएकोमा खतिवडालाई चिकित्सकले उपचारकै क्रममा मृत घोषणा गरेका हुन् ।