आलु प्याजमा लगाएको कर संशोधन गर्नुपर्छ : डा. शेखर कोइराला
मकालु खबर
काठमाडौँ । नेपाली काँग्रेसका नेता डा. शेखर कोइरालाले सरकारले बजेटमार्फत आलु प्याजमा लगाएको कर सुधार गर्न आवश्यक रहेको बताएका छन् । सोमबार काठमाडौँमा भएको ट्रेड युनियन काँग्रेसको ७ औँ महाधिवेशनलाई सम्बोधन गर्दै नेता कोइरालाले यस्तो बताएका हुन् ।
उनले सरकारले जनतालाई विदेशबाट आयात भएका आलु, प्याज र स्याउमा मूल्य बढ्ने र नेपाली उत्पादन सस्तो हुने भनेर झुक्क्याएको बताए । उनले जुनसुकै वस्तुमा १३ प्रतिशत कर लगाएपछि वस्तुको मूल्य सस्तो नभए महँगो हुने दाबी गरे ।
अर्थमन्त्रीले नेपाली उत्पादनको मूल्य सस्तो बनाउने नाममा आलु, प्याजमा कर लगाउनु नेपाली उपभोक्ताको लागि राम्रो नभएको उनको भनाइ थियो । उनले नेपाली जनताको भान्सा महँगो भएकाले सरकारले आलु, प्याजमा लगाएको कर तत्काल संशोधन गरेर जान माग गरे । सत्तापक्षका सांसदहरूले नै आफ्ना मागहरू सम्बोधन नभए बजेट पास हुन नदिने भनेकाले यस्तो अवस्था काँग्रेस कसरी अगाडि बढ्ने विषयमा छलफल गर्न आवश्यक रहेको उनको भनाइ थियो ।
नेता कोइरालाले सरकारले बजेटमा जिल्ला निर्वाचन कार्यालय प्रशासन कार्यालयको शाखा बनाउने विषयको विरोध जनाएका छन् । उनले सरकारले जिल्ला निर्वाचन कार्यालयहरू खारेज गरेर प्रशासन कार्यालयको शाखा बनाउँदा कसरी निर्वाचन स्वच्छता र निष्पक्ष हुन्छ सरकारले बुझाउन समेत आग्रह गरे ।
उनले अहिले देशले बाटो बिराएको जस्तो आफूलाई आभास भएको बताए । उनले मुलुकमा जबाफदेहिता, उत्तरदायित्व, सुशासन र दण्डहीनताको अन्त्य हुन नसके लोकतन्त्र सुदृढ हुन नसक्ने बताए । उनले नेपाली काँग्रेस लोकतन्त्र सुदृढ बनाउन खरो रूपमा मैदानमा उत्रन आवश्यक रहेको जनाए । उनले मुलुकमा दण्डहीनता, सुशासन, भ्रष्टाचार मौलाएको भन्दै चिन्ता व्यक्त गरेका छन् ।
मकालु खबर
