आफै ‘इलेक्ट्रिक बाइक’ बनाएर कुदाउने पारसलाई एसपीएको सम्मान, शतप्रतिशत छात्रवृत्ति

काठमाडौँ । विद्युतीय मोटरसाइकल (इलेक्ट्रिक बाइक) निर्माण गरेका कैलालीको गोदावरी नगरपालिका-५ गेटाका पारस साउँदलाई धनगढीको एसपीए कलेजले कदरपत्रसहित सम्मान गरेको छ । शुक्रबार क्याम्पस प्रमुख योगराज उपाध्यायले इलेक्ट्रिक बाइक निर्माण गर्दै हजारौँ युवाहरूका लागि प्रेरणा बनेको भन्दै पारसलाई सम्मान पत्र प्रदान गरेका हुन् ।

यसैवर्ष एसइई दिएका पारसको प्रतिभालाई प्रोत्साहन दिने उद्देश्यले कलेजले शतप्रतिशत छात्रवृत्ति दिने समेत घोषणा गरेको छ । कलेजले पारसको आगामी प्रोजेक्टहरूमा पनि लगानी गर्ने प्रतिबद्धता जनाएको छ ।

‘नवप्रवर्तक, आविष्कार, उद्यमीहरूलाई प्रोत्साहन गर्नु, उनीहरूलाई अघि बढ्न प्रेरित गर्नु एसपीएको नीति नै हो,’ क्याम्पस प्रमुख उपाध्यायले भने, ‘यसअघि पनि एसपीएले थुप्रै आविष्कारक विद्यार्थीहरूलाई प्रोत्साहन सहयोग गर्दै आएको छ । पारसलाई पनि हामीले शतप्रतिशत छात्रवृत्तिमा अध्ययन गराउने तथा उनका आगामी प्रोजेक्टमा सहयोग गर्ने घोषणा गर्न पाउँदा अन्त्यन्तै खुसी लागेको छ ।’

आफ्नो प्रतिभालाई चिन्दै कलेजको गरेको सम्मानप्रति पारसले आभार व्यक्त गरे । साथै आफ्नो भविष्यका प्रोजेक्टहरूमा एसपीएबाट सहयोग पाउने भएपछि अन्त्यन्तै खुसी भएको बताए । ‘यसअघि पनि एसपीएले मजस्तै आविष्कारक युवाहरूलाई प्रोत्साहन गर्दै आएको सुन्दै आएको थिए । यसपटक मलाई कलेजमै बोलाई यो हौसला दिनुभएकोमा अन्त्यन्तै खुसी लागेको छ,’ पारसले भने, ‘कलेजले मेरो सम्पूर्ण पढाई खर्चसहित आगामी प्रोजेक्टमा पनि सहयोग गर्ने भएपछि एसपीए कलेजसँगको मेरो आगामी यात्राले थप उचाइ लिने विश्वास गरेको छु ।’

पारस घरमै डेढ महिनाको समयमा झण्डै १ लाख रुपैयाँको लागतमा उक्त मोटरसाइकल निर्माण गरेका हुन् । उनले बनाएको बाइक आरएफआईडी सिस्टमयुक्त हो । जसका कारण बाइक स्टार्ट गर्न चाभीसँगै एक विशेष कार्डको पनि आवश्यकता पर्छ । जसकारण बाइक चोरिने सम्भावना हुँदैन । बाइकमा रिभर्स सिस्टम(पछाडि पनि चलाउन मिल्ने) छ । ६० किलोमिटरको गतिमा चल्न सक्छ । एकपटक चार्ज गरेमा ७० देखि ८० किलोमिटर सम्म बाइक गुड्न सक्छ । यस्तै बाइकको अगाडि डिजिटल डिस्प्ले पनि राखिएको छ । जसमा ब्याट्रीको अवस्था, बाइकको स्पिड, कुँदेको किलोमिटर, लाइट, सिग्नल आदि महत्त्वपूर्ण जानकारी हेर्न सकिन्छ ।

बाइक निर्माणमा पारसलाई एसपीएकै विद्यार्थी सोहन कैनी र सागर खनालले सहयोग गरेका हुन् । यसअघि सोहनले कलेजको सहयोगमा इलेक्ट्रिक बाइक तथा सागरले एसपीए इभी मोडल वान कारको निर्माण गरिसकेका छन् ।