को-को पुगे विश्वकप क्वालिफायरको सुपर सिक्समा ?

काठमाडौँ । आइसीसी क्रिकेट विश्वकप क्वालिफायरको सुपर सिक्समा पुग्ने ६ देशको टुंगो लागेको छ । आइतबार सम्पन्न समूह बि अन्तर्गतका खेलपछि समूह बि को सुपर सिक्समा पुग्ने देशको टुंगो लागेको हो ।

समूह ए बाट सुपर सिक्समा पुग्ने तीन देशको टुंगो शनिबारनै लागेको थियो । समूह ए बाट जिम्बाबे, वेस्टइन्डिज र नेदरल्याण्डस सुपर सिक्समा पुगेका छन् भने नेपाल र अमेरिका बाहिरिएका छन् । त्यस्तै समूह बि बाट श्रीलंका, स्कटल्याण्ड र ओमान सुपर सिक्समा पुगेका छन् ।

त्यस्तै टेस्ट खेल्ने देश आयरल्याण्ड आफ्ना शुरुका तीन खेलमा हार बेहोरेसँगै सुपर सिक्सको दौडबाट बाहिरिएको छ भने युएई यसअघि नै तीन खेलमा हार बेहोरेर सुपर सिक्स पुग्नबाट बाहिरिएको थियो ।

यद्यपि दुवै समूहका समूह चरणका खेलहरू खेल्न बाँकी रहेकाले समूह विजेता, उपविजेता र तेस्रो टिमको टुंगो भने लागेको छैन । त्यस्तै दुवै समूहका चौथो र पाँचौँ हुने देशले पनि सातौँ, आठौँ, नवौँ र दशौँ स्थानका लागि प्लेअफ खेल्ने हुनाले पनि यसको टुंगो समूह चरणका सबै खेल सकिएपछि लाग्ने छ । समूह चरणका अन्तिम खेल मंगलबार सकिने तालिका रहेको छ ।