विमानमा समस्या आउन थालेपछि श्री एअरलाइन्सका उडान स्थगित

काठमाडौँ । श्री एयरलाइन्सका सबै उडान स्थगित भएका छन् । श्री एअरलाइन्स प्रालिले आजका लागि पूर्व निर्धारित सबै उडानहरू स्थगित गरेर विमान परीक्षण गर्ने भएको हो ।

एयरलाइन्सका कर्पोरेट प्रबन्धक अनिल मानन्धरले जारी गरेको प्रेस नोटअनुसार आइतबारका सबै उडान स्थगित गरिएको छ । श्री एअरलाइन्सका सबै उडान स्थगित गरी आइतबार दिनभर कम्पनीका सबै विमानको प्राविधिक परीक्षण गर्ने निर्णय भएको छ ।

सोमबारदेखि भने सबै उडान नियमित रूपमा सञ्चालन हुनेछन् । शनिबार काठमाडौँबाट धनगढीका लागि दिउँसो ३ः३० बजे उडेको विमानमा प्राविधिक समस्या आएको थियो । जसकारण धनगढी उडेको सो विमान पुनः काठमाडौँ नै फिर्ता गरी अवतरण गराइएको थियो ।

सो घटनापछि एयरलाइन्सले सबै विमानको प्राविधिक परीक्षण गर्ने निर्णय लिएको श्री एअरलाइन्सले जनाएको छ ।