उज्यालो अभियानअन्तर्गत १९ सय जनाको आँखाको निःशुल्क शल्यक्रिया

तुलसीपुर । उज्यालो अभियान कार्यक्रम अन्तर्गत करिब १९ सय जनाले नयाँ दृष्टि पाएका छन् । नेपाल नेत्रज्योति संघ, आँखा स्वास्थ्य कार्यक्रम राप्ती तथा बहादुरगञ्जले विभिन्न स्थानीय सरकारहरू सँग आर्थिक वर्ष २०७९ र ८० मा सञ्चालन गरेको ‘उज्यालो साझेदारी’ कार्यक्रम अन्तर्गत १ हजार ८ सय ९९ जनाको मोतियाविन्दुको निःशुल्क शल्यक्रिया गरी उज्यालो पर्दान गरिएको हो ।

नागरिकहरूले मोतियाविन्दुका कारण दृष्टिबिहिन जीवन यापन गर्नु नपरोस् र नेपाल सरकारको आँखा स्वास्थ्य रणनीतिलाई समेत सहयोग पुर्याउने उद्देश्यले स्थानियतहरुसंग निःशुल्क मोतिविन्दुको शल्यक्रियाका लागि सम्झौता गरी गत आर्थिक वर्षमा उज्यालो अभियान सञ्चालन गरिएको बताउँछन् प्रमुख प्रशासक सम्शेर थापा ।

उक्त कार्यक्रम अन्तर्गत एक वर्षमा १ हजार ८ सय ९९ जनालाई उज्यालो प्रदान गरिएको समेत बताए । पैसा र पहुँचको अभावका कारण कोही कसैले पनि अनहाकमै आँखाको ज्योति गुमाउन नपरोस् भन्ने मुख्य उद्देश्यका साथ उज्यालो कार्यक्रम संचालन गरिएको उनको भनाइ छ ।

उज्यालो अभियान अन्तर्गत राप्ती आँखा अस्पतालले दाङको तुलसीपुर उपमहानगरपालिकामा २ सय ५९ जना, घोराही उपमहानगरपालिकामा १ सय ८७ जना, शान्तिनगर गाउँपालिकामा ८९ जना , बबई गाउँपालिकामा ४९ जना र दंगिशरणमा १०० जनाको मोतियाविन्दुका बिरामीहरूको शल्यक्रिया गरी उज्यालो पर्दान गरिएको बाह्ये कार्यक्रम संयोजक शालिकराम गौतमले जानकारी दिए ।

त्यस्तै सबै भन्दा बढी देउखुरीमा रहेको लमही आँखा अस्पतालले लमही नगरपालिका भित्रका ४ सय ७ जना, गढवा गाउँपालिकामा ३ सय १० जना रापजपुर गाउँपालिका वडा नं ३ ले ५ जना र लमही नगरपालिका वडा नं। ६ ले ९ जनाको गरी ७ सय ३२ जना यस आर्थिक वर्षमा मोतियाविन्दुको शल्यक्रिया गरी उज्यालो पर्दान गरेको नेत्र सहायक विमल घिमिरेले जानकारी दिए । त्यस्तै लमही आँखा अस्पतालले प्युठानको सरुमाई रानी गाउँपालिकामा समेत साझेदारी मार्फत उज्यालो अभियान पुर्याई ४९ जना मोतियाविन्दुका बिरामीहरूको शल्यक्रिया गरी उज्यालो पर्दान गरेको छ ।

त्यस्तै छन्द कालेबाबु नारायणी आँखा अस्पताल बहादुरगञ्जले कृष्ण नगर नगरपालिकाका वडा नंं। ३ देखि १२ वडा सम्ममा २ सय ५५ जना बिरामीहरूको शल्यक्रिया गरी उज्यालो पर्दान गरेको बाह्ये कार्यक्रम सहसंयोजक हरि भण्डारीले जानकारी दिए । त्यस्तै कपिलवस्तु जिल्लाको बुद्धभुमि नगरपालिकामा १ सय जना र शिवराज नगरपालिकामा ८० जना मोतियान्दिुका बिरामीहरूको आँखा शल्यक्रिया गरिएको प्रशासकीय अधिकृत जसराज विश्वकर्माको भनाई छ ।

यस अभियानले दृष्टि विहिन्ताको न्यूनीकरण हुनुका साथै उज्यालो अभियानले आर्थिक अभाव तथा अन्य कारणले घरमानै दृष्टि विहीन भएर बसेकाहरूलाई सहज भएको अस्पताल व्यवस्थापन समितिका अध्यक्ष कृष्णकुमार गिरीले जानकारी दिए । ‘हामीले हुने सँग लिने र नहुने लाई आँखा उपचार सेवा दिने हो त्यसमा पनि स्थानीय सरकारको पनि आँखा स्वास्थ्य सेवामा साझेदारी गरेर अगाडी बढऔं भन्ने हाम्रो उद्देश्य हो उनले भने ।’

त्यस्तै सरूमारानी गाउँपालिका अध्यक्ष झगबहादुर विश्वकर्माले पालिकामा रहेको अन्धोपन न्यूनीकरण गर्न आफूहरू लागेको बताए । ‘उज्यालो अभियान जनताका लागि अति आवश्यक कार्यक्रम हो पालिकाको अन्धोपन न्यूनीकरणका लागि साझेदारी कार्यक्रम गरी यो वर्ष कम्तीमा पनि आधालाई उज्यालो हामीहरूले पर्दान गर्ने म प्रतिबद्धता जाहेर गर्छु — अध्यक्ष विश्वकर्माले भने ।

उनले यस आर्थिक वर्षमा करिब ४९ जनाको निःशुल्क मोतियाविन्दुको शल्यक्रिया गरेको भन्दै अव ३२० जनाको शल्यक्रिया गर्नुपर्ने तथ्याङ्कले देखाएको र यस वर्ष आधा आँखा रोगीलाई शल्यक्रिया गरी उज्यालो प्रदान गर्ने बताए । त्यस्तै दंगिशरण गाउँपालिकाका अध्यक्ष शम्भु गिरीले पनि आँखा अस्पताल र आफूहरूको साझेदारीमा पहिलो पटक सञ्चालन गरेको अभियान प्रभावकारी भएको बताए ।

उनले उज्यालो आँखा कार्यक्रमलाई आगामी आर्थिक वर्ष पनि निरन्तरता दिइनेछ । सम्झौताभन्दा बढी मोतियाबिन्दुका बिरामीको शल्यक्रिया बापतको रकम आगामी आर्थिक वर्षमा भुक्तानी दिने गरी व्यवस्था मिलाइने नीति कार्यक्रममा समेत उल्लेख गरेको बताए । त्यस्तै घोराही उपमहानगरपालिका, तुलसीपुर उपमहानगरपालिका, तथा अन्य गाउँपालिका नगरपालिका र वडाहरूले पनि यस अभियानलाई आगामी वर्षमा पनि निरन्तरता दिने बताएका छन् ।

नेपाल नेत्रज्योति सङ्घको ‘हाम्रो कर्तव्य, हाम्रो जिम्मेवारी, आँखा सेवामा साझेदारी’ कार्यक्रमलाई सफल बनाउन सबै स्थानीय पालिकामा छलफल समेत भएको प्रमुख प्रशासक सम्शेर थापाले बताए । उनले जनप्रतिनिधिले पालिकाका जनतालाई उज्यालो अभियान सञ्चालन गरी अन्धोपन लागि साझेदारी गर्ने प्रतिबद्धता जनाएको समेत बताए ।

नेपाल नेत्र ज्योति सङ्घले हाल देशभरमा २७ वटा आँखा अस्पताल, १५४ आँखा उपचार केन्द्र र ४४ वटा जिल्ला शाखामार्फत गुणस्तरीय आँखा उपचार सेवा प्रवाह गर्दै आइरहेको छ ।